МЕМЛЕКЕТТІК ҚЫЗМЕТКЕРЛЕР – СПАРТАКИАДА САҢЛАҚТАРЫ
Елордада мемлекеттік мекемелер қызметкерлерінің дәстүрлі спартакиадасы мәресіне жетті. Қазақстан Республикасы Тәуелсіздігінің 25 жылдығына арналып өткізілген жарыстың жеңімпаздары мен жүлдегерлерін Астана қаласының әкімі Әділбек Жақсыбеков құттықтап, салтанатты жағдайда Кубок тапсырды.
Астана қаласы Дене тәрбиесі және спорт басқармасы ұйымдастырған кешенді жарысқа елордадағы барлық мемлекеттік мекемелер қатысты. Жарыс жолына шыққан әуесқой спортшылар шахмат, үстел теннисі, волейбол, бильярд, футбол, арқан тарту және жеңіл атлетикалық эстафета бойынша сайысқа түскен. Жалпы, мәлімет бойынша 500-ге жуық
қызметкер спартакиада қатысушысы болды.
Спартакиада жүлделері екі бағытта сарапқа салынды. Жалпы мемлекеттік мекемелер қызметкерлері өзара жарысқа түссе, күштік құрылымдар арасындағы сайыстар бөлек ұйымдастырылды.
Сонымен үш айға жалғасқан спартакиаданың қорытындысында мемлекеттік мекемелер қызметкерлері арасында Астана қаласының Қазынашылық департаменті ұжымы бірінші орынды жеңіп алды. Жеңімпаз команда жалпы есепте 337 ұпай жинады. Екінші орынға 316 ұпай еншілеген Астана қаласының Құрылыс басқармасы ие болды. Үшінші орынға Астана қаласының Мемлекеттік мүлік және жекешелендіру департаменті табан тіреді. Әсіресе, осы үш команданың арасындағы футбол бәсекесі өте тартысты өткенін атап айтуға болады. Доп додасында Мемлекеттік мүлік және жекешелендіру департаментінің футболшылары жеңіске жеткен еді. Екінші орынға Қазынашылық департаментіні қызметкерлері ие болса, Құрылыс басқармасының ұжымы қола жүлдені қанағат тұтқан еді.
Ал, күштік құрылымдар арасындағы бәсекеде Астана қаласының Төтенше жағдайлар жөніндегі департамент командасы топ жарды. Астана қаласының Мемлекеттік кірістер департаменті қызметкерлері екінші орыннан көрінді. Ал үздік үштікті Астана қаласының Ішкі істер департаменті командасы түйіндеді.
Сонымен, Астана қаласындағы мемлекеттік мекемелер қызметкерлері арасындағы спартакиада өз мәресіне жетті. Жеңімпаздар мен жүлдегерлерге дипломдар, медальдар және сыйлықтар табыс етілді.
Ғалым ҚОЖАБЕКОВ