Астана қаласы Есіл ауданының әкімдігінде мемлекеттік қызметкерлер күніне арналған жиын өтті. Онда аудан әкімі Сәбила Мұстафина осы салада еңбек етіп жүрген мамандарды айтулы күнмен құттықтап, ізгі лебізін білдірді.
– БҰҰ Бас Ассамблеясының 2002 жылғы 57-сессиясының шешімімен 23 маусым «Мемлекеттік қызметкерлер күні» болып бекітілді. Біздің елімізде Елбасының 2013 жылғы «Қазақстандағы кәсiптiк және өзге де мерекелер туралы» бұйрығына орай аталған мереке ресми мәнге ие болды. Бүгінгі таңда мемлекеттік қызметкерлерге жүктеліп отырған міндет салмақты. Осы салада еңбек етіп жүрген кез келген маман жаңа тұжырымдамаларға сәйкес уақыт талабына сай жұмыс істеп, халықтың сенімінен шығатын жауапкершілігі мол тұлғаға айналуы қажет. Біздің аудан әкімі аппаратында 30-дың үстінде мемлекеттік қызметкер еңбек етеді. Олардың дені – болашағынан көп үміт күттіретін
жастар. Сондықтан, барлықтарыңызды мерекелеріңізбен құттықтаймын!, – деп сөзін сабақтады Сәбила Сапарқызы.
Салтанатты шара аясында аудан басшысы осы салада өз еңбегімен ерекше көзге түскен қызметкерлерді алғыс хатпен марапаттады. Сондай-ақ, жұмысқа жаңа қабылданған екі жас маман ант қабылдады.
Азамат ЕСЕНЖОЛ
