Менделеевшiлер мерейi
Астанада 46-Халықаралық Менделеев олимпиадасы өтуде. Әлемнiң 18 елiнен жүзден астам оқушы қатысып жатқан бұл сайысқа осы жолы алғашқы рет Франция, Венгрия және Грузия елдерiнiң командалары қатысып отыр.
Бiлiм сайысының салтанатты ашылу рәсiмi ҚР Президентi Н.Ә.Назарбаевтың құттықтау сөзiмен басталды. ҚР Мемлекеттiк хатшысы Мұхтар Құл-Мұхаммед оқып берген Елбасы сөзiнде соңғы жылдары елiмiз жастар арасындағы бiрқатар мәртебелi интеллектуалды жарыстардың орталығына айналғандығын, республика осымен екiншi мәрте талантты жас химиктердi қабылдап отырғандығы айтылды.
Жыл сайын сәуiр айының соңы мен мамыр айының басында өтетiн Халықаралық Менделеев олимпиадасы бұрынғы Бүкiлодақтық химия олимпиадасының «iзбасары» десе болады. Және жыл сайын оның ауқымы кеңейiп келедi.
Биылғы додаға елiмiзден 15 жас «алхимик» қосылды.
«Қазақстандық оқушылардың олимпиадаға дайындықтары, әсiресе, химиядан өте жоғары екендiгi анық. Бұл бiлiм жарысынан олар алтын медальдi бұған дейiн де иеленген болатын. Бiздiң университеттiң химия факультетiн үздiк бiтiргендер де бар» дедi шараға орай өткiзiлген баспасөз мәслихатында Халықаралық Менделеев олимпиадасының президентi, М.Ломоносов атындағы Мәскеу мемлекеттiк университетi химия факультетiнiң деканы Валерий Лунин.
Сәуiрдiң 29-ына дейiн жалғасатын, үш кезеңнен тұратын сайыстың бастапқы 2 кезеңi теориялық болса, соңғысы Назарбаев университетi зертханасында өтедi.
Сайыс нәтижесiнде жүлделi орындарға ие болған оқушы ММУ-ге немесе ТМД-ның кез келген жоғары оқу орнына тегiн түсе алады.
Сондай-ақ, ХМО аясында бiрқатар iс-шаралар өтiп жатыр. Солардың бiрi – кешегi «Ғалымдармен диалог» атты ғалымдар кездесуi. Лунин, Кузьменко, Рыжова секiлдi белгiлi химия ғалымдары қатысқан бұл басқосуда химияның бүгiнгi ғылыми әлеуетi және осы саладағы өзектi мәселелер туралы сөз қозғалды.