Астанада Тұңғыш Президент күніне орай әлеуметтік акция басталды. Ізгі ниеттен туындаған шара аясында елордамыздағы 1000 отбасыға қайырымдылық көмек көрсетілмек.
Қайырымдылық көмек азық-түлік жиынтығы және ақшалай төлем түрінде де әзірленген.
Әлеуметтік көмек ретінде берілетін азық-түлік жиынтығы құрамында – 50 келі картоп, 25 келі күріш, 5 келі қант және 5 литр күнбағыс майы бар.
Кеше қалалық Жұмыспен қамту және әлеуметтік бағдарламалар басқармасы өкілдері жүк көлігіне тиелген азық-түлікті көпшілікке таратуды бастап кетті. Көмек керуені 1 желтоқсанға дейін жалғасады.
Қайырымдылық көмекке алғашқы ие болғандардың бірі Жәмилә Наурызбаева «Отбасымда бес бала бар. Ең үлкенім — студент. Кішкентайым екі жаста. Тұңғыш Президент күні құрметіне деп үйімізге азық-түлік әкеліп берді. Біздің жағдайымызды ескеріп, осындай қайырымдылық көрсетіп жатқан қала әкімдігіне ризашылығымды білдіремін» дейді көңілі көтеріліп.
Еркежан СӘТІМБЕК
