Астанада ерекше қажеттіліктері бар адамдарға қолдау көрсететін, оқытатын және сұранысқа ие жұмыс орындарына орналасуға көмектесетін әлеуметтік кәсіпорындар бар. Солардың бірі – GARBAR Group компаниясы, деп хабарлайды astana-akshamy.kz
Кәсіпорын үй және қоғамдық тамақтану орындарына арналған жиһаз өндірісімен айналысады. Оның мамандары ерекше қажеттіліктері бар жандарды да оқытады.
GARBAR Group астаналық әлеуметтік-өндірістік компанияның негізін қалаушы. Директоры Ирина Радиховскаяның айтуынша, оқыту барысы дәнекерлеу, ағаш ұстасы және жұмсақ жиһаз өндірісі сияқты салаларды қамтиды. Белгілі бір дағдысы барлар үшін ең төменгі жалақысы 150 000 теңгемен жұмысқа орналасуына жағдай жасалған.
Бұл кәсіпке жаңадан келгендер үшін компания түсіндірме күнін өткізеді, онда олар жұмыс процесін көріп, әрі қарай оқу туралы шешім қабылдай алады.
Бұл жобаларды сәтті жүзеге асыруда мемлекеттік және қоғамдық ұйымдармен ынтымақтастық маңызды рөл атқарады. Жұмыспен қамту орталықтары, қоғамдық қорлар мен әлеуметтік кәсіпкерлер бірлестіктері мақсатты аудиториямен байланыс орнатуға, оқуға және жұмысқа орналастыруға мұқтаж адамдарды осы кәсіпорынға жіберуге көмектеседі. Сонымен қатар, компания өзге де кәсіпорындарда ерекше қажеттіліктері бар адамдар үшін жаңа жұмыс орындарын ашу бойынша белсенді жұмыс жүргізіп жатыр.
Сондай-ақ, компания үміткердің қабілетін және шектеулерін анықтау үшін егжей-тегжейлі сұхбат жүргізеді.
Осылайша, кәсіпорында бес жылдан бері табысты еңбек етіп, өзін жоғары білікті маман ретінде көрсете білген ДЦП диагнозы бар дәнекерлеуші жұмыс істейді.
Есту және сөйлеу қабілеті бұзылған тағы бір қызметкер оқуды аяқтап, құрал-саймандармен жұмыс істеуді игеріп, жеке аяқ киім жөндеу шеберханасын ашты.
«Біз осы жетістіктерімізбен шектелмейміз және ерекше қажеттіліктері бар адамдар үшін толық қолжетімді ортаны қамтамасыз ететін оқу ғимараттары бар жаңа зауыт ашу жобасымен белсенді жұмыс істеп жатырмыз», – деп атап өтті Ирина Радиховская.
Мемлекеттік субсидиялар да маңызды қолдау факторы болып саналады.
«Жеңілдетілген несиелендіру және әлеуметтік кәсіпкерлерді субсидияланған жұмыс орындары мен гранттар сияқты қолдаудың басқа да шараларының арқасында компания мүмкіндігі шектеулі жандарды жұмыспен қамтамасыз етіп қана қоймай, сонымен қатар жаңа салаларды, мысалы, арнайы бағдарламалау жолымен басқарылатын станоктарда жиһаз шығаруды дамытып отыр. Бұл өнімнің таңдауын кеңейтіп, сапасын арттыруға, қосымша жұмыс орындарын ашуға мүмкіндік береді», – деді кәсіпорын басшысы.
