Ішкі істер министрлігінің мұражайында Астана қаласы ІІД ювеналды полиция бөлімшесінің есебінде тұрған кәмелет жасына толмаған балаларға арналған экскурсия өткізілді. Астана қаласы Жастар саясаты басқармасының ұйымдастыруымен өткен бұл шараға 300-ге жуық адам қатысты.
Мұражайда ұйымдастырылған бұл экскурсияның берері мол.
Ондағы экспонаттар мен сол замандағы милиция қызметкерлерінің киім формалары мен қолданған қаруларының көз алдыңда жатуы аса әсерлі. Тап-таза болып сүртілген шыны ішіндегі әрқалай істің куәсі болған жәдігерлер арасымен жүріп өткенде тек көріп қана қоймай, әр нәрсенің өз уақытындағы күндеріне сапар шегіп, тірі аңызды естігендей күйде боласың. Күнделікті өмірде көріп, қолға ұстап жүрмегеннен кейін, көне маузер, шиті мылтық, қолдан жасалынған шолақ мылтықты, жүзі әліге дейін мұқалмай сақталып келе жатқан қанжар мен сонау Жапонияда жасалынған самурай қылышын, ел тыныштығы жолында ерлік жасап, аты аңызға айналған тәртіп сақшыларына берілген марапат медаль-ордендерді көргенде ерекше күйге түсесің. Бұл жәдігерлердің барлығының мұражайға әкеліну тарихы мен салмақты себебі бар.
Үлгі боларлық адам не үшін керек? Кейінгі өзінің артынан келе жатқан жастың соған қарап бағыт алып, дамуға ұмтылып, өз жолын анықтауы үшін қажет. Әскери-патриоттық тәрбие-қылмыстың алдын алу үшін жас ұрпаққа дұрыс жол көрсетіп, жаман істен сақтандырудағы мықты күш. Мұның барлығы жеке адамға тән ерлік, тәрбиелілік, адами борыш деген игі қасиеттердің жас өскін
бойында дамуына сеп болмақ…
Астана қаласында орналасқан мұражай өз бастауын өткен ғасырдан алады. 1973 жылдың 17 ақпанындағы Қазақ КСР Ішкі істер министрлігінің арнаулы шешімімен 1975 жылдың 7 қазанында ашылған. Тәуелсіз ел болғаннан кейін 1995 жылы Қазақстанның ішкі істер қызметі қайта құрылып, айтарлықтай өзгертулер жасалды. Милиция атауы полиция деп өзгертіліп, құқықтық статистика прокуратураның құзырына беріліп, қылмыстық-атқару жүйесі мен сараптамалық қызмет әділет министрлігінің қарамағына өтті. 1997 жылдың 27 қазанында Ішкі істер министрлігі Астанаға көшірілді. Одан кейін артынша 2000 жылы ІІМ-нің Алматыдағы мұражайы Астанаға әкелініп, министрлік ғимаратынан 219 шаршы метрлік орын берілді.
Қазіргі күнде мұражайдың экспозициясы мемлекеттік рәміздер қойылған кіреберістен басталып, тарихи кезеңдерге бөлінген жеті экспозициялық залдан тұрады.
Музей залдарын аралай жүріп, мұражай меңгерушісі Светлана Әмірбекқызын әңгімеге тартқан едік.
– Мұражайда қанша жәдігер бар? Және олар қалай толықтырылып отырады?
– Мұнда 1500-ге тарта заттай жәдігер, фото-құжаттық материалдар,
130-ға жуық қару, 350-ге тарта мемлекеттік марапаттар, орден-медальдар, 180-нен астам сыйлықтар, жалпы саны он мыңға жуық жәдігер бар. Негізінен, мұндағы заттар көбіне сол ішкі істер қызметкерлерінің туған-туыстары әкелген жәдігерлер есебінен толығады.
– Жақында мұражай қорында елеулі толықтыру болғанын естідік. Осы жөнінде не айтасыз?
– Иә, осыдан аз уақыт бұрын мұражайда Қазақстан Республикасының «Халық қаһарманы» Байтасов Ғазиз Әбдібекұлына арналған бұрыш ашылды. Онда Ғазиз Байтасовқа «Халық қаһарманы» атағын беру жөніндегі Елбасының жарлығы жазылған құжат пен үлкейтілген суреті және батырға қатысты жәдігерлер қойылған.
Жәнібек НҰРЫШ
