Найль НУРОВ, «Алау» мұзайдыны сарайының директоры: ӘЛІ ТАЛАЙ РЕКОРДТАР ЖАҢАРТЫЛАДЫ
– «Алау» мұзайдыны сарайы коньки тебуден барлық қашықтықтағы ең жоғарғы нәтиже бойынша әлемдік рейтингте қай сатыдан көрінді?
– Әлемдегі 645 мұз айдыны ішінен барлық қашықтықтағы уақыт бойынша ерлер арасында алтыншы орынды иеленсек, әйелдер арасында он бірінші тұғырға жайғастық. Бұл – үлкен көрсеткіш. Мұндай жетістікке жетудің басты себебі – «Алау» жылдам мұз жасауға мүмкіндік беретін заманауи жоғарғы технологиялық құрал-жабдықтармен жабдықталған әрі әлемдік деңгейдегі сарай. Сондықтан, алдағы уақытта біздің айдында әлі талай рекордтар жаңартылатыны сөзсіз.
– «Алау» алғаш пайдалануға берілген сәттен бастап қандай рекордтарға қол жеткізді?
– Әлемдік тәжірибеде алғаш ашылған мұзайдын сарайларының қадамы сәтсіз болып келетіні белгілі. Бұл ретте біздің «Алау» бірінші күндердің өзінде рекордтық көрсеткіштерге қол жеткізді. Менің ойымша, бұл сарайдың әлеуетінің жоғары екенін дәлелдейді. Өйткені, әрбір жарыс соңында жабдықтар дәлме-дәл күйге келтіріліп, сапасы арттырылады, құрылыс шаңдары тазартылып, судың ыңғайлы параметрлері сұрыпталады. Сондықтан да, Азия ойындары кезіндегі 9 континенттік рекорд, мамандардың айтуынша, асар асулардың шегі емес. Мұны бүгінгі жетістігіміз де айқындап берді.
– Айдынның жұрт біле бермейтін қандай артықшылықтары бар?
– «Алау» – бұл кәсіби спортшыларға да, әуесқойларға да спортпен айналысу үшін кешенді қызметтер ұсынатын спорттық орталық. Мұнда ірі халықаралық жарыстар, оқу-жаттығу жиындары өткізіледі. Астаналық оқушылар коньки тебу, мәнерлеп сырғанау және хоккей спорты бойынша жаттығады. Әлем кубогы өткізілгеннен кейін жеңімпаздар айдыны әуесқойларға да қолжетімді болды, яғни, жаппай сырғанау күндері мұнда символдық құны үшін әр қалаушы өз конькиімен кіре алады. Бұл өз кезегінде Астанада бұқаралық спорт түрін дамытуға мүмкіндік деп ойлаймын. Сонымен қатар, фитнес-орталық, әмбебап спорт зал, СПА-орталық, төрт жұлдызды қонақ үй, мейрамхана есігі астаналықтар мен қала қонақтарына әрдайым ашық.