НАҚ-НАҚ
Қауымдастыққа жаңа президент сайланды
Бұрнағы күні Спорт баспасөзі қауымдастығының кезекті құрылтай конференциясы өтіп, ұйымның президенті болып Ілияс Омаров сайланды.
«І.Омаров – ҚР спорт баспасөзі қауымдастығына лайықты жетекші. Оның білімі мен тәжірибесі біздің ұйымның қызметінде жетістіктерге жетуге мүмкіндік береді деген ойдамын» деді өз сөзінде отандық спорт баспасөз қызметі қауымдастығының бұрынғы жетекшісі Несіп Жүнісбаев.
Жалған кәсіпкерліктің жолы кесілмек
Қаржы полициясы жалған кәсiпкерлiктiң жолын кесу мақсатында екiншi деңгейлi банктерден алуға болатын қолма-қол қаражаттың көлемiн шектеудi ұсынды.
Агенттiктiң статистикасына сәйкес, Қазақстанда «көлеңкелi» экономиканың көлемi кем дегенде ЖIӨ-нiң 20 пайызына тең. Бұл шамамен жылына 5 трлн теңге. Соның ең қомақты бөлiгiн жалған кәсiпкерлiк алады.
Ар-намыс кодексі жөнінде семинар өтті
Жақында Қазақстан Республикасы Мемлекеттік қызмет істері агенттігінің Астана қаласы бойынша департаменті Астана қаласының Әділет департаментімен бірге Қазақстан Республикасы мемлекеттік қызметшілерінің Ар-намыс кодексі талаптарының сақталуы туралы семинар өткізді.
Бас қосуды Астана қаласы Әділет департаментінің басшысы Қ.Мусин ашып, Департамент басшысы – Тәртіптік кеңес төрағасы Т.Қаскин «Қазақстан-2050» Стратегиясы мен мемлекеттік қызмет саласындағы жүргізіліп жатқан реформалар жөнінде әңгіме өрбітті.
Семинарда мемлекеттік қызметшілердің Ар-намыс кодексінің сақталуы тұрғысында департаменттің инспекция және бақылау бөлімінің консультанты А.Омарәлиева баяндама жасап, Тәртіптік кеңес хатшылығының меңгерушісі –департамент басшысының орынбасары Ж.Ақтөреев мемлекеттік қызметшілердің қызмет этикасы, азаматтармен қарым-қатынастағы сыпайылық пен әдептілік таныту мәселелеріне жан-жақты тоқталды.
Жиналысты Т.Қаскин қорытындылап, қатысушылардың көптеген сұрақтарына жауап берді.
Таңатар Төлеуғалиев