Танымал қазақстандық кәсіпкер, «Шымкент пиво» серіктестігінің директоры Тоқтар Төлешов жер реформасына қатысты митингтердi қаржыландырған және билікті күшпен басып алуға дайындық жұмыстарын жүргізген. Бұл туралы кеше Бас прокуратурада өткен брифинг барысында Ұлттық қауiпсiздiк комитетi баспасөз қызметiнiң өкiлi Руслан Карасев мәлімдеді.
«Тергеуде Төлешов мырзаның бұрын билікті күшпен басып алуға дайындық жұмыстарын жүргізгендігі, өткен жылдан бері белсенді нақты әрекеттер қолданғаны туралы толық мәліметтер алынды. Оның жоспарында қауіпті ошақтарды бақылап, ел ішіндегі жағдайды тұрақсыздандыру, наразылық акцияларын және жаппай тәртіпсіздіктерді ұйымдастыру, соның айналасында баламалы үкіметті қалыптастыру және әрекет етуші билік құрылымын өзгерту қарастырылған. Атырау, Астана, Алматы, Орал және Қызылорда қалаларындағы жер реформасына қарсы наразылық акцияларын Төлешов мырза былтырғы жылдың желтоқсан айында дайындап, қаржыландырғаны туралы дәлелдер бар. Аталған наразылық акцияларын бұдан да ертерек өткізу жоспарланғаны анықталған. Бірақ, Төлешевтің тұтқындалуына байланысты акцияны өткізу уақытын ұйымдастырушылар өзгерткен. Қазіргі таңда олардың кейбіреулері құрықталған» деді Р.Карасев.
Комитет өкілінің айтуынша, тергеу органдары Қазақстанның басқа да өңірлерінде ұйымдастырылған наразылық акцияларын қаржыландыру фактілерін қараған.
«Төлешев тергеу изоляторында бола тұра елдегі қалыптасқан жағдайды пайдаланып, 2016 жылдың мамырында Оңтүстік Қазақстан облысының Сарыағаш қаласында жаппай тәртіпсіздік ұйымдастыруға әрекеттенген. Өзінің жоспарларын іске асыру мақсатында Төлешов құқық қорғау органдарының бұрынғы және Қарулы күштердің жоғары лауазымды тұлғалары, сондай-ақ, Қарулы күштердің кейбір басшылары қатарынан мақсатты түрде өзінің жақтастарын іздестірген. Төлешов мырза жасырған орындардағы қару-жарақ пен жарылғыш заттарды Ұлттық қауіпсіздік комитеті тәркілеген» деді ол.
