Негізгі мақсат – бәсекелестікті дамыту
Астана экономикалық форумы – Еуразиялық кеңістікте жыл сайын өтетін үлкен халықаралық жиын. Елордада әр жылы әлемдік экономикалық қоғамдастықтың өкілдері, қазіргі және бұрынғы мемлекет басшылары, Нобель сыйлығының лауреаттары, әлемдегі ғылыми саланың органдары мен бизнесмендері осы айтулы жиында бас қосады. Биылғы 25 мамырда өтетін ІХ Астана экономикалық форумы аясында бәсекелестік мәселелеріне арналған «Бәсекелестікті ілгерлету: жаңа «ойын ережелері» атты сессия өткізу жоспарланған.
Мемлекет басшысы Н.Назарбаевтың бес институционалдық реформаны жүзеге асыру жөніндегі «Жүз нақты қадам» Ұлт жоспарында монополияға қарсы қызметтің жұмыс тұжырымдамасын өзгерту және ЭЫДҰ (Экономикалық ынтымақтастық жəне даму ұйымы) стандарттарына сәйкес келтіру көзделгені белгілі. Бұл 53-ші қадамда қарастырылған. Осы қадамды іске асыру барысында Қазақстан Республикасының монополияға қарсы заңнамасын үздік халықаралық тәжірибеге және халықаралық стандарттарға сәйкес келтіру бағытында жұмыстар жүргізілуде. Форумда осы қадамның жай-жапсары да кеңінен талқыланатын болады.
Астанада екі күн бойы өтетін биылғы экономикалық форумының басты тақырыбы «Жаңа экономикалық шынайылық: әртараптандыру, инновациялар және білім экономикасы» деп аталады. Сондай-ақ, экономикалық форум шеңберінде бәсекелестік мәселелеріне қатысты арнайы кеңес өткізіледі.
Өткен жылы 29-30 қазанда Парижде ЭЫДҰ-ның бәсекелестік жөніндегі жаһандық форумның отырысы өткен еді. Оның бір сессиясы біздің еліміздегі құқық саласындағы бәсекелестік заңнамасына және саясатына сараптамалық шолу жасауға арналған болатын. Пікір білдірген білікті мамандар еліміздің жетістіктерін жан-жақты атап өтті. Биыл Қазақстан Республикасының монополияға қарсы реттеу қызметінің құрылғанына 25 жыл толады. Мұны атап өту де маңызды оқиға болып табылатыны сөзсіз.
Биылғы Астана экономикалық форумының бірінші күнін, яғни 25 мамырға ең негізгі шаралар жоспарланып отыр. Сессия бағдарламасында Премьер-министрдің бірінші орынбасары Б.Сағынтаевтың, ЭЫДҰ-ның Бәсекелестік жөніндегі комитетінің төрағасы Фредерик Женнидің және әлемнің жетекші монополияға қарсы органдары өкілдері баяндамалар жасайды. Сондай-ақ, сессияға қатысушылар ЭЫДҰ-ның стандарттарына және үздік халықаралық тәжірибеге сәйкес келтіру мақсатында Қазақстан Республикасының монополияға қарсы заңнамасына енгізілген соңғы өзгерістермен танысады. Бұл сессияның негізгі мақсаты – Қазақстан Республикасының қазіргі заманғы экономикалық саясатын дамытудағы монополияға қарсы реттеу мен бәсекелестікті қорғаудың рөлін және оны одан әрі дамыту жолдарын айқындап көрсету. Соның негізінде болашақ бағдар белгіленеді.
Меңдолла НҰРЫМҰЛЫ