Астана қаласы Есіл ауданы Белсенді ұзақ өмір сүру орталығының ұйымдастыруымен «Сағыныш сазы» ансамблінің 5 жылдығына орай есеп беру концерті өтті.
Құрамында 20 зейнеткер бар өнерлі ұжымның негізін қалаушы – «Мирас» қайырымдылық қоры ұйымдастырған «Бір мүмкіндік» сайысының жүлдегері, ұстаз, термеші, сазгер, күйші, әнші Күлзағила Барлыкова, көркемдік жетекшісі – ҚР еңбек сіңірген мәдениет қайраткері Жанарбек Ескендіров пен Шәрбат Құрманова.
– Біздің ансамбль 5 жыл бойы жұмыс істеп келеді. Көптеген қатысушы ансамбль құрылғалы бері ән салып, музыкалық аспаптарда ойнап келеді. Оркестр құрамында домбыра, қобыз, сылдырмақ ойнайтын ардагер өнерпаздарымыз бар. Шынын айтсақ, біз осы орталыққа келгенде көңілімізде алаң болды, бірақ үйренісіп кеттік. Енді, міне, өзіміз де ән айтып, сахнада өнер көрсетеміз, – дейді ансамбльдің көркемдік жетекшісі Шәрбат Құрманова.
Кеш барысында зейнеткерлер ән шырқап, күй тыңдап, өнерін ортаға салып, көрермендердің ыстық ықыласына бөленді.
