Тәрбие – балабақшадан басталады. Мектеп жасына дейінгі баланы дамытатын, өсіретін әрі тәрбиелейтін негізгі іс-әрекет – ойын. Өйткені, ойын арқылы бала өзін қоршаған ортамен, табиғатпен, адамдардың еңбегімен танысады.
Халқымыз ойындарды баланың жас ерекшелігіне қарай бағалаған. Эстетикалық тәрбие берудің маңызды құралы балаларды ұйымшылдыққа үйретеді. Ойынның түрлері көп, соның ішінде маңыздысы – дидактикалық ойындар. Баланың қызығушылығын оятып, белсенділігін арттыру мақсатында Астана қаласындағы «Салтанат» балабақшасында «Ойнайық та, ойлайық!» ашық сабағы өтті. Дидактикалық ойындарға негізделген сабақтың пайдасы көп. Жаттығулар арқылы балалардың сөздік қорын байытуға, ойлау қабілетін дамытуға болады.
«Қызғалдақ» тобында өткізілген ашық сабақта балаға қарама-қарсы сөздерді анықтау дағдыларын қалыптастыруды көздейтін «Суреттің жұбын тап», «Ұқсас сөздер» ойындары ұйымдастырылды. Соңында бүлдіршіндер дөңгелене тұрып, жүрекше беру арқылы бір-біріне жылы сөздермен тілек айтты. Қызықты өткізілген ойын «Арайлап атқан әр таң бізге жақсылық нұрын шаша берсін!» деген хормен аяқталды.
Мәдина СӘДІРОВА,
№57 «Салтанат» балабақшасының педагог-психологы
