Ойын алаңдары көбейсе…
Қалалық мәслихат хатшысы Жанат Нұрпейісов Республика даңғылы, 7/2 үйдің тұрғындарымен кездесіп, олардың түйткілдерін тыңдады.
Аталған үйге қарама-қарсы «Астана LRT» ЖШС-не қарасты спорт алаңы орналасқан екен. Алайда тұрғын үйдің ауласында балалар ойнайтын алаң жоқ. Тұрғындардың айтуынша, серіктестіктің алаңында күмәнді адамдар жиі жиналады. Сондықтан олар балалар қауіпсіздігіне алаңдайды. Халық балалардың қауіпсіздігін қамтамасыз етіп, жеткіншектердің ойынына лайықтау үшін спорттық алаңды уақытша пайдалануға беру мәселесін қарастыруды сұрады.
Бұл кездесуге Сарыарқа ауданы әкімінің орынбасары Ришат Тұрдыбеков, Көлік және жол-көлік инфрақұрылымын дамыту басқармасының, Активтер және мемлекеттік сатып алу басқармасының, «Астана LRT» ЖШС, қаланың ПИК қауымдастығының өкілдері қатысып, тұрғындардың талап-тілектерін тыңдады. Қазіргі таңда мұндағы «Астана LRT» ЖШС иелігіндегі аумақ пен паркингті қаланың коммуналдық меншігіне беру үдерісі жүріп жатқанын жеткізді. Тиісті жұмыстан соң тұрғындарды уақытша пайдалануға беру мәселесін заңдық тұрғыдан қарастыратынына сендірді. Қандай шешім шықса да, тұрғындар хабарсыз қалмайтынын айтып өтті.