Өңірлік жәрмеңке басталады
Шаһардағы бағаны тұрақтандыру және тұрғындарға азық-түлікті қолжетімді бағада сатып алу мүмкіндігін ұсыну мақсатында елордадағы «Думан» СОО орталығының, Қ. Мұңайтпасов атындағы стадионның, Оқушылар сарайының автотұрақ аумағында жәрмеңкелер ұйымдастырылуда. Онда республиканың түкпір-түкпірінен әкелінген азық-түлік өнімдері арзан бағада сатылады.
Осы аптада биылғы 54-жәрмеңке өтті. Шара барысында бірқатар азық-түлік тауарларының бағасы кәдімгідей төмендегенін байқадық. Мысалы, Астана қаласы мен Қызылорда облысы әкімдіктері арасында жасалған меморандум аясында бұл жолы күріштің келісі 175 теңге болды.
Қалалық Ауыл шаруашылық басқармасы өкілдерінің айтуынша, 3 қыркүйектен бастап апта сайын өңірлік жәрмеңкелер өткізу жоспарланып отыр. Әр жәрмеңке кезінде бақылаушылар бағаға мониторинг жүргізеді. Сондай-ақ, барлық жәрмеңке алаңдарына тексеру таразылары қойылады. Мұның бәрі бағаны қолдан көтермелеуге жол бермеу үшін жасалмақшы.
Жалпы, жәрмеңкелер маусымы басталғалы бері елордада құны 660 миллион теңге көлеміндегі 1304 тонна ауыл шаруашылық өнімі сатылыпты.
Ботагөз МАРАТҚЫЗЫ