Дүниежүзілік СПИД-ке қарсы күрес күніне орай Нұр-Сұлтан қаласында биыл 15-25 қараша аралығында «СПИД: әрбірін түсіну» тақырыбымен онкүндік өткізіледі.
Қалалық СПИД-ке қарсы күрес орталығының директоры Сәбит Абдраимовтың айтуынша, адамдардың қауіпсіздігі, жеке басына қатысты стигма мен кемсітушілікті жою, барлық мұқтаж жандарды қажетті дәрі-дәрмектермен және қызметтермен қамтамасыз ету – орталықтың басты міндеті. «Бұл ауру пайда болғанына 40 жыл өтсе де, әлі де жаһанға қауіп төндіріп тұр. Өткен 10 айдың көрсеткіші бойынша қаламызда 277 адамнан СПИД анықталған. Оның 197-сі – ерлер, қалғаны – әйелдер. Жалпы Нұр-Сұлтан қаласы бойынша алғаш тіркелген күннен бүгінге дейін 2272 адам тіркеуде тұрады» дейді ол.
Онкүндік аясында онлайн форматта Қазақ ұлттық өнер университетінің классикалық камералық музыкасының концерті ұйымдастырылады. Сондай-ақ әлеуметтік желілерде үкіметтік емес ұйымдар мен медицина қызметкерлерінің қатысуымен қала тұрғындарына арналған #Услышать каждого#Әрбірінтүсіну#toHearEveryone атты челленджі өткізіледі. Науқан барысында газеттерде, электронды БАҚ-тағы үздік жарияланым және үздік теле/радио материалы үшін журналистер арасындағы байқаудың қорытындысы жарияланады. Мектеп және колледж студенттері арасында дерттің алдын алу бойынша викториналық ойындар, жастарға арналған форум ұйымдастырылады. Астана медицина университетінің студенттері арасында дебат, ірі ЖОО-да СПИД бойынша жедел тестілеу өткізіледі. Достық кабинетінде, №15 қалалық емханада СПИД бойынша экспресс-тестілеуден ашық есік күндері болады. Әлеуметтік желілерде #Барлығы СПИД туралы шарасы ұйымдастырылады. Орталықта есепте тұрған адамдар арасындағы аз қамтылған отбасыларға азық-түлік таратылады. Онкүндік қорытындысы 25 қарашада баспасөз мәслихатында шығарылады.
