Бас қалада халықаралық «Copernicus» олимпиадасының жеңімпаздары марапатталды. АҚШ-тың Хьюстон қаласында өткен дүбірлі додада астаналық оқушылар жаратылыстану бағыты бойынша бақ сынап, олжалы оралған еді.
Республиканы халықаралық деңгейде даңққа бөлеп, өздерінің білімі мен талантының арқасында жеңіске жеткен оқушылардың қатарында Алидан Сәулебек, Кәрім Дүйсеков және Тимур Цой бар. Дарынды оқушыларды құттықтаған Астана қаласы әкімінің орынбасары Есет Байкен жылы лебізін де жеткізді.
«Оқушыларымыз әлемнің жүзден астам еліндегі қатарластарымен зияткерлік сайыста жарысып, еліміздің намысын абыроймен қорғай алды. Осындай табысқа жету жолында сіздерге қолдау көрсеткен ата-аналарыңыз бен ұстаздарыңыздың да еңбегін ерекше атап өткім келеді. Балаларымыздың білім жолына бар күш-жігерін арнайтын ұстаздар мен ата-аналарға алғысымыз шексіз. Бұл жеңістеріңіз ғылым жолындағы алғашқы белестеріңіз болады деп сенемін» деді Е.Байкен.
Жеңімпаздардың қатарындағы Шейх Халифа бен Заид әл-Нахаян атындағы №84 мектеп-лицейдің 9-сынып оқушысы Алидан Сәулебек химия пәні бойынша бас жүлдені қанжығаға байлады. Quantum STEM мектебінің 4-сынып оқушысы, сайыстың ең кішкентай қатысушысы Кәрім Дүйсеков пен республикалық физика және математика мектебінің 9-сынып оқушысы Тимур Цой 1-орын иеленді. Кездесу барысында жас дарындылармен әңгімелесіп, бас қаланың намысын халықаралық деңгейде қорғай білген оқушыларға қала әкімінің арнайы алғыс хаты табысталды.
Индира Бержанова
