Өрелі өнер ордасы
Талай таланттың томағасын сыпырған Қазақ Ұлттық Өнер университетіне 15 жыл толды. Күллі әлемді хас талантымен тәнті еткен, Мемлекеттік сыйлықтың иегері, Халықаралық шығармашылық академиясының академигі, профессор Айман Мұсақожаева басқаратын өнер ордасы шығармашылық шыңдардың талайын бағындырып, Алаштың атын әлемге танытты.
Алаштың ақмаңдай қызы
Қазақ Ұлттық Өнер университетінің атағы бүгінде дүрілдеп тұр. Даңқы тек Алаш жұртына ғана емес, төрткүл дүниенің төртбұрышына да таралды. Өнер ордасының талантты ұл-қыздары талай халықаралық байқауларда бақ сынап, Батыстың өзін бас идіріп келеді. Оқу ордасының шәкірттері байрақты бәсекеде топ жарып, Қазақ деген халықты әлемге танытқан сайын Алаштың Аймандай ақмаңдай қызынан айналасың.
Айман Қожабекқызы – халқымыздың маңдайына біткен біртуар тұлға. Ұлт өнерінің бағына жаралған жарық жұлдыз.
Айман Мұсақожаева қаршадайынан өнерге жақын болып өсті. Кішкентайынан апа-сіңлілерімен бірге, Абай атындағы опера және балет театрының қойылымдарына баратын.
Соның ықпалы болса керек, ағайынды төрт қыз Алматыдағы Күләш Байсейітова атындағы музыка мектебіне оқуға түсті.
Жастайынан Нұрғиса Тілендиев, Ғазиза Жұбанова, Арам Хачатурян, Валерий Климов сынды мықтылардың көзіне түсіп, батасын алған Айман 18 жасында-ақ жұлдыздай жарқырап, Югославияда өткен халықаралық сайыста жеңiмпаз атанды. Содан кейін-ақ атақ-даңқы аспандай берді, аспандай берді. Дүниежүзінің дүйім дүлдүлдерімен үзеңгі қағыстырып, талай бәйгелерден ат оздырды. Скрипканың құдіретті сазымен талғамы биік талай көрерменнің жүрегіне жол тапты. Қазақтың ақмаңдай қызының талантына бас имеген, қол соқпаған ел кемде-кем шығар. Есімі «XX ғасырдың 2000 көрнекті музыканты» атты дүниежүзілік құрметті тізімге енді. Күллі Алаштан жалғыз өзі «Әлем әртісі» атағын алуының өзі көп нәрсені аңғартса керек. Оған атақты Страдиваридің скрипкасы сеніп тапсырылуы да бекерден-бекер емес.
Кейін өзі де «Солистер академиясы» камералық оркестрін ұйымдастырып, шығармашылығын шыңдай түсті.
Айман Қожабекқызы қай елге, қай жерге барса да туған елінің тұғырын биіктетуді есінен шығарған емес. «Шет мемлекеттерге гастрольдік сапарлармен шығып, концерт қойған кезде ең алдымен сырт елдер қазақ өнерін білсе екен, таныса екен деген мақсатты алға қоямын. Сол себепті Евгений Брусиловский, Ғазиза Жұбанова, Тiлес Қажығалиев, Еркеғали Рахмадиев тәрізді отандық композиторлардың шығармаларын жиі орындаймын. Қазақ музыкасы – қаймағы бұзылмаған кіршіксіз өнер. Оның табиғатын, жан-дүниесін шетел тыңдармандары да жақсы сезінеді. Үнемі қошемет білдіріп, ілтипат көрсетіп жатады», – дейді Айман Қожабекқызы.
Биікті бағындырған білім ордасы
Ел мақтанышына айналған білім ордасының іргетасы Астанамен бірге, 1998 жылы қаланған. Ұлт өнерінің үлкен шаңырағын көтеру әрі оны бас шаһардың мәртебесіне сай әлемдік оқу орны деңгейіне жеткізу – ауыз толтырып айтарлықтай ауқымды іс. Әрі ол кез келгеннің қолынан келе бермейді. Осы тұрғыдан алғанда Айман Мұсақожаева бір өзі бір министрліктің жұмысына татитын істі ойдағыдай алып шықты. Талантты жастардың дарынын ұштауға ден қойған ол мақсатын жүзеге асыру жолында аянбай тер төкті.
– Гастрольдік сапарлармен көптеген мемлекеттерді аралаған кезде, олардың музыкалық білім жүйесіне ерекше қызығушылық танытатын едім. Өз елімізде де осындай үлкен өнер ордасын құру – көптен көкейімде жүрген жоба болатын. Бір кездесуде осы ойымды Елбасына жеткіздім. Маған бірден қолдау білдірген Президент болашақ Музыка академиясы жаңа астанада ашылу қажеттігін айтты. Ол кезде мен Ақмола қаласын онша біле бермейтін едім. Бірақ жаныма жай тапқызбаған ойымның осы шаһарда жүзеге асуға тиіс екендігіне іштей өзімді дайындап жүрдім, – дейді Айман Қожабекқызы.
Сөйтіп, қазіргі Өнер университеті – бұрынғы Чайковский атындағы №1 музыка мектебi мен Ақмоланың музыка колледжiнiң базасында құрылды. Қиындықтар болмай қалған жоқ. Білікті мамандардың тапшылығын былай қойғанда, олардың әлеуметтік мәселелерін шешу оңайға соқпады. Мұның сыртында құрал-жабдықтар мен музыкалық аспаптардың жетіспеушілігі, оқу аудиторияларының аздығы, қаражат тапшылығы бар. Бірақ Айман Қожабекқызы мойыған жоқ. Елбасының сенімі мен қамқорлығын жанына демеу етіп, түйткілді мәселелерді біртіндеп шеше бастады.
1998 жылы Астананың халықаралық тұсаукесерімен бірге, бұрынғы Музыка академиясы – қазіргі Қазақ Ұлттық Өнер университетінің де тұсауы кесілді. Бұл салтанатты жиынға Елбасы Нұрсұлтан Назарбаевтың өзі қатысты.
Бұл өнер ордасындағы оқу жүйесі ерекше. Шет мемлекеттердікі сияқты, білім берудің барлық түрі бірыңғай оқыту жүйесіне біріктірілген. Яғни оқу ордасы табалдырығын аттаған жеткіншек дипломын қолға ұстап, бір-ақ шығады.
Таланттар тоғысқан шаңырақ
Бүгінгі күні Қазақ Ұлттық Өнер университетінде оқыған да, оқымаған да арманда болып тұр. Есілдің сол жағалауындағы «Шабыт» шығармашылық сарайына қоныс тепкен білім мен өнер ордасында оқушылар мектептен кейін колледжде, колледжден кейін университетке түсуге мүмкіндігі бар. Тіпті бакалавриат, магистратура сатыларын бітіргенше оқуын жалғастыра алады. Оған университеттің материалдық-техникалық базасы толығымен жеткілікті. «Шабытта» екі балет залы, екі театр залы, аэробика залы және әр буынның өзіне лайық студиялары жұмыс істейді. Орган залының өзі бар iрi орталыққа айналды. Орталық Азия бойынша сирек кездесетiн үздiк орган залында небiр iрi жарыстар мен фестивальдер өткiзiлiп, атақты органшылар өнер көрсетедi.
Қазіргі күні университет дамудың жаңа жолына түскен. Білім ордасында мектеп-колледж кешенінде 5 бағдарлама, бакалавриатта –19 және магистратурада 15 бағдарлама бойынша мамандар әзiрлейді.
Оқу орнында тек 2010 жылдың өзінде жаңа өнер мамандықтары ашылды: мәдениеттану, өнертану, хореография, кескiндеме, мүсiн, режиссура (көркем және деректі кино), операторлық өнер, сценография (киiм дизайны, грим-визаж), кiтапхана iсі. Сонымен қатар, 6 факультет жұмыс істейді: музыка; театр, кино және ТВ; дәстүрлi музыкалық өнер; хореография; бейнелеу өнерi; әлеуметтiк-гуманитарлық ғылым.
Университет құрылымының бірі – өнертану ғылыми-зерттеу институтында келешекте ЮНЕСКО кафедрасы мен фольклор кабинетін ашу жоспарланып отыр. Осы оқу ордасы түлектерінің бірі қалмай, жұмыспен қамтылатыны да университеттің мәртебесін, оқытудағы сапасын білдірсе керек.
Университет шәкірттері жыл сайын Австрияда, Венада, Ватиканда, Сан-Бартоломеода өтетiн халықаралық конкурстарда топ жарып, жүлдегер атанып, ел мерейін асқақтатып жүр. Бүгінгі күнге дейін жастар 500 халықаралық байқаудың, 400-ден астам республикалық сайыстың лауреаттары атанып үлгерген.
Кезінде Қазақстанның орталық, солтүстік өңірлерін, соның ішінде Астанадағы шығармашылық ұжымдарды жоғары білімді кәсіби мамандармен қамтамасыз етуді міндетіне алған өнер ордасы бүгінде сол мақсатына толық жетті деуге әбден негіз бар.
ҚазҰӨУ-де сабақ беріп, шәкірттер тәрбиелеп жүрген оқытушылар да осал емес. Олардың басым көпшілігі елімізге танымал тұлғалар. Атап айтқанда, Е.Рахмадиев, К.Дүйсекеев, С.Еркімбеков, С.Әбдінұров, Қ.Байбосынов, Ә.Сығай, Б.Нөгербек, Ә.Тарази, Р.Мұқанова, Т.Әліпбаев сынды өз кәсібінің білікті мамандары өз шеберліктерінің қыр-сырын шәкірттерге үйретіп келеді.
Бұл бұл ма, мұнда сырт мемлекеттерден де келіп сабақ беретін Ресей мен Еуропаның білікті музыканттары да баршылық. Мысалы, Мәскеу, Петербург, Киев, Минск, Вена мен Лондон консерваториясымен жасалған келісім-шарттар бар. Жыл сайын университетімізге Италияның өнер шеберлері де келіп, дәріс оқиды.
Мерейтой мәзірі
Қазақ Ұлттық Өнер университетінің 15 жылдық мерейтойы жоғары деңгейде өтті. «Қазақстан» орталық концерт залында арнайы әзірленген ауқымды бағдарламамен басталған мерейтойлық кеш ҚР Халық әртісі, Мемлекеттік сыйлықтың лауреаты Айман Мұсақожаева мен «Айгөлек» балалар скрипкашылар ансамблінің орындауындағы Ф.Крейслердің «Г.Пуньяни стиліндегі Прелюдия мен Аллегро» шығармасымен ашылды.
Концертке Франция, Ресей, Әзірбайжан, Беларусь, Қырғызстан, Латвия мен Италияның белгілі өнер қайраткерлері мен жоғары оқу орындарының басшылары арнайы келді.
Мерекелік кеште жұртшылық Өнер университетінің бүгінгі күнге дейінгі қол жеткізген жетістіктерін тамашалап, дәстүрлі және әлемдік музыка жауһарларымен сусындап қайтты.
Осы мерейтой құрметіне Астанада он күн бойы халықаралық өнер форумы өтті. Онда италиялық пианист Бруно Канино, Ресейдің Халық әртісі Максим Федотов, Граф Муржа, германиялық әйгілі музыкант Михаил Ваймен сынды тұлғалар қатысып, өнер көрсетті.
Ал кеше халықаралық Өнер форумы аясында «Шабыт» шығармашылық сарайында скрипкаға арналып жазылған әуендердің концерті өтті. Онда С.Франк және И.Брамстың скрипка мен фортепианоға арналған шығармалары әуелесе, екінші бөлімде «Солистер академиясы» мемлекеттік камералық оркестрі мен Астана Мемлекеттік филармониясының концерті көрермен қауымға жол тартты.
Енді Айман Мұсақожаева басқаратын шығармашылық топ «Әлемнің сегізінші кереметі – Астана» атты осы мерейтойлық концерттік бағдарламасын Астанадан бөлек, Милан және Турин, Вашингтон мен Париж, Токио мен Лос-Анджелес сынды әлемнің ірі мегаполистерінде де ұйымдастыру мақсатында, гастрольдік сапарға аттанбақ. Түпкі мақсат – қазақтың өнерін төрткүл дүниеге таныту.
Қымбат ТОҚТАМҰРАТ