Ел тынысы

Орталық Азия елдері қауіпсіздік кеңестері хатшыларының бірінші кездесуі өтті



Астана қаласында Орталық Азия елдері қауіпсіздік кеңестері хатшыларының бірінші отырысы өтті, деп хабарлайды astana-akshamy.kz

Басқосуға Қазақстан Республикасы Қауіпсіздік Кеңесінің Хатшысы Ғизат Нұрдәулетов қатысты.

Жиын барысында өңірлік және халықаралық қауіпсіздіктің өзекті мәселелері, соның ішінде су-энергетикалық және азық-түлік қауіпсіздігі салаларындағы ынтымақтастықты дамыту ісі жан-жақты қарастырылды.

Сонымен қатар тараптар Орталық Азия елдерінің көлік қауіпсіздігі мен көлік-логистика әлеуетін дамыту аспектілерін талқылады.

Қазақстан Республикасы Қауіпсіздік Кеңесінің Хатшысы әріптестеріне аталған мәселелер бойынша еліміздің ұстанымы туралы мәлімет берді. Сондай-ақ трансшекаралық өзендердің ресурстарын тиімді басқару, суды теңдей әрі әділ пайдалану қағидаттарына негізделген біріктірілген су саясатын әзірлеу және оны жүзеге асыру, өзара міндеттемелерді мүлтіксіз орындау жөніндегі ынтымақтастықты дамытуға қатысты бірқатар ұсыныс айтты.

Орталық Азиядағы азық-түлік қауіпсіздігін қамтамасыз етудің ортақ стратегиялық тәсілдерін қалыптастыру, сондай-ақ аймақтың экономикалық байланыстарын нығайту мақсатында көлік дәліздерін одан әрі дамыту қажет екені атап өтілді.

Бірінші кездесудің қорытындысы бойынша тараптар өңірлік қауіпсіздікті нығайту саласындағы тығыз ынтымақтастықты жалғастыруға дайын екенін білдірді.




Тағыда

admin

«Астана ақшамы» газеті

Ұқсас жаңалықтар

Back to top button