ОТБАСЫ – ӘЛЕУМЕТТІК БЕРЕКЕНІҢ НЕГІЗІ
Гүлнәр САҒЫНДЫҚОВА, Астана қаласы Әділет департаментінің бөлім бастығы
Қазіргі уақытта неке тұрақсыздығы өткір мәселелердің бірі болып отыр. 2012 жылдың алғашқы тоғыз айында Астана қаласында 6846 неке тіркелсе, оның 1950-і сәтсіз аяқталды. Жұмыс барысында жауапсыздықтың кесірінен туындайтын келеңсіз оқиғалармен бетпе-бет келгенде жаның ауырып, жүрегің сыздайтыны рас. Өйткені, отбасының бұзылуы кінәсіз сәбилердің жетім атануы-на, соның салдарынан елімізде балалар үйінің көбеюіне әкеліп соғары анық. Елбасы биылғы Жолдауында «Мен ажырасуға қарсымын, жастарды отбасы құндылығы, ажырасудың қасірет екендігі рухында тәрбиелеу керек, өйткені, оның салдарынан, ең алдымен, балалар зардап шегеді. «Әкесі қой баға білмегеннің баласы қозы баға білмейді». Бала тәрбиесі – тек ананың емес, ата-ананың екеуіне де міндетті» деп өте орынды айтты. Отбасының құндылығы, жанұяның бақыты мемлекет үшін ең маңызды мәселе екендігін еске салды.
Елбасы Жолдауында «Бала тәрбиелеу – болашаққа ең үлкен инвестиция» деді. Расында, бала – мемлекеттің басты байлығы, қазынасы және болашақ тірегі. Халқымызда «Ағаш түзу өсу үшін оны жас шыбық кезінен баптау керек, үлкен ағашқа айналғанда оны түзету қиын» деп бекер айтылмаған. Баланың бойына жастайынан ізгілік, мейірімділік, адамгершілік секілді құнды қасиеттерді сіңіру үшін оның толыққанды отбасы болуы керек.
Сондықтан, Мемлекет басшысының ана мен баланы қорғау, отбасы және неке саласындағы заңнаманы түбегейлі қайта қарау жөнінде Үкіметке тапсырма беруі дер кезінде қабылданған оңды шешім болды.