Отбасылық орталықтар көбейеді
Елордада жыл соңына дейін 2 отбасылық денсаулық орталығы ашылады. Бұл туралы Нұр-Сұлтан қалалық қоғамдық денсаулық сақтау басқармасы басшысының міндетін атқарушы Әлия Рүстемова айтты.
Оның айтуынша, «Шипагер» отбасылық денсаулық орталығы» ЖШС-нің ашылғалы отырған 2 нысаны бар. Біреуі Тұран даңғылы, 55 мекенжайында орналасқан. Нысанға жөндеу жұмыстар жүргізіліп жатыр және 15 желтоқсанда ашылады. Орталық 14 400 адамға қызмет көрсетеді. Келесі орталық – Сауран көшесі, 15 мекенжайында. Ол жерде де жөндеу жұмыстары жүргізіліп жатыр және қарашаның ортасында аяқталады. Онда шамамен 3,5 мың тұрғынға арналған екі учаске болады. «2018-2020 жылдар аралығында жаяу 20 минуттық жердегі қолжетімділікті қамтамасыз ететін 30 «Үйдегі дәрігер» нысаны ашылды. Биыл мұндай 10 нысан ашу жоспарланған» деді ол қалалық мәслихаттың тұрақты комиссиясы отырысында.