ҚР Ұлттық академиялық кітапханасында белгілі мемлекет және қоғам қайраткері, «Нұр Медиа» холдингінің бас директоры Жанай Омаровтың «Өзектен өткізілген уақыт» («Время, которое живет в нас») атты кітабының тұсаукесері өтті. Айтулы шараға елімізге танымал зиялы қауым өкілдері қатысты.
Жаңа кітапқа қарымды қаламгердің таңдаулы мақалалары мен сұхбаттары, деректі фильм сценарийлері және естелік жазбалары топтастырылған. Дәлірек айтқанда, азаттық алғаннан кейінгі уақыттағы мемлекеттің әлеуметтік-экономикалық, саяси даму кезеңі мен Елбасы Нұрсұлтан Назарбаевтың тәуелсіз мемлекеттің қалыптасуы жолындағы тарихи рөлі мазмұндалған. Ұзақ жылдар бойы бұқаралық ақпарат құралдары саласында жауапты қызметтер атқарып жүрсе де, қаламын қолынан тастамай, қоғамдағы түрлі құбылыстарды ой елегінен өткізіп, оны салмақты дүниеге айналдыра білген қаламгердің азаматтық бейнесі мен адамгершілік қасиеті айтулы кеште көбірек айтылды.
Әсіресе, тұсаукесер тізгінін ұстаған «Егемен Қазақстан» республикалық газеті» АҚ президенті Сауытбек Абдрахманов автордың шығармашылығы мен өмірдегі адами келбетіне тоқталды. Қаламгердің әкесі қазақтың көрнекті жазушысы – Сейітжан Омаров екенін де айтып өтті. Расында, жазушылар арасында Сейітжан аға туралы, оның өте бір биязы мінезі мен парасатты болмысы жайында жазылған естеліктер жетерлік.
Жаңа жинақ жайында автордың бір сапта жүрген әріптестері де шынайы пікірлерін білдірді.
– Бұл кітап – қазақ публицистикасына қосылған сүбелі еңбектердің бірі. Өйткені, кітаптың философиялық мазмұны мен көтерген тақырыбының ауқымы оның өміршеңдігін айқындайды. «Время, которое живет в нас» деген атауының өзі көп дүниеден сыр шертеді. Бұл тұрғыда автордың ой-пікірі қазақ көсемсөзінің хас шебері Шерхан аға Мұртазаның толғамдарымен үндесетінін айтқым келеді, – деді «Астана ақшамы» газетінің бас редакторы Аяған Сандыбай.
Көрнекті ғалым Мырзатай Жолдасбеков кітапта жарияланған бір ғана суреттің тарихын әсерлі тарқатып берді.
Ал, автордың өзі: – Бұл кітапқа 1994 жылғы «Панорама» газетіне шыққан кішкентай мақаламнан бастап жиырма жыл ішінде жинақталған таңдаулы туындыларым кірді, – дейді.
Шара соңында белгілі ақын Нұрғожа Ораз бен Мырзатай Жолдасбеков жаңа кітаптың тұсауын кесіп, ақ батасын берді.
Азамат ЕСЕНЖОЛ
