Астана қаласының Балалар құқықтарын қорғау департаменті Елбасының «Қазақстанның әлеуметтік жаңғыртылуы: Жалпыға Ортақ Еңбек Қоғамына қарай 20 қадам» мақаласы аясында «Заман талабына сай өзін-өзі тану пәнінің оқу және тәрбие үдерісіне енгізу қажеттілігі» атты қалалық ғылыми-тәжірибелік конференция өткізді. Шараға ҚР Білім және ғылым министрлігі Балалардың құқықтарын қорғау комитетінің, «Бөбек» ұлттық-ғылыми-практикалық білім беру және сауықтыру орталығының, Астана қаласы Білім басқармасының, Отбасылық тәрбиелеу институтының өкілдері, сондай-ақ өзін-өзі тану пәнінің мұғалімдері қатысты.
Жиналғандар өзін-өзі тану пәнінің басқа пәндермен кіріктірілуін, рухани-адамгершілік білім беру жүйесінде педагогтардың біліктілігін арттыру, өзін-өзі тану пәнінің элементтерін қолдана отырып, балаға тәрбие беру, мектеп пен отбасының өзара қарым-қатынасы жөніндегі мәселелерді талқылады.
Сонымен қатар, шара барысында өзін-өзі тану педагогтарының жұмысын насихаттау және өзара тәжірибе алмасу мақсатында «Өзін-өзі» танудың ғажайып әлемдері» атты көрме ұйымдастырылды.
«Бөбек» ұлттық-ғылыми-практикалық білім беру және сауықтыру орталығының директоры Қорлан Жампейісованың айтуынша, баланы жан-жақты дамытып, өзінің ішкі дүниесін тану арқылы өмірдің мәнін пайымдауға үйретуді мақсат ететін «Өзін-өзі тану» рухани-адамгершілік білімінің қағидалары мен әдістеме-нұсқауларының қайнар бұлағы – ұлттық, жалпыадамзаттық құндылықтардан негіз алады. Жиын соңында аталмыш пән бойынша бірқатар ұсыныстар қабылданды.
Еркежан СӘТІМБЕК
