Пайдалы прототиптер жасады
Кеше Назарбаев университетінде «TOM: Nur-Sultan» мейкатоны өтті.
Елордада тұңғыш рет ұйымдастырылып отырған 72 сағаттық марафонда 7 топ бақ сынады. Олар мүмкіндігі шектеулі жандардың өмір сапасын арттыратын прототиптерді жасады.
– Іс-шараның басты мақсаты – жастар арасындағы интеллектуалдық кластерді дамыту. Мәселен, біздің Жастар ресурстық орталығы Нұр-Сұлтан қаласының жастар саясатын жүзеге асыру барысында түрлі жастармен жолығамыз. Сонда ғылыми-зерттеу қызметін мықтап дамыту қажеттігін түсіндік. Мейкатон секілді сайыстар осыған көмектеседі деп ойлаймын, – дейді «Астана жастары» ұйымының жетекшісі Шыңғыс Тілеулин.
Байқауда жастар ерекше көмекті керек ететін кісілерге арналған механикалық арбаларды жетілдіріп, балдақ пен тайғанауға қарсы аяқ киімнің жаңа түрін ұсынды, сондай-ақ бір команда көзі көрмейтін адамдар үшін мобильді қосымша ойлап тапса, енді бірі аяқ бұлшық еттерін жаттықтыратын аппарат жасады.