ПАРИЖ ТӨРІНЕ КИІЗ ҮЙ ТІГІЛЕДІ
Франция астанасы Парижде 31 қазан мен 3 қараша аралығында Астана қаласының күндері өтеді.
Франция – көрме өткізу жөнінен тәжірибесі мол ел. Осы тұрғыда елордалық мамандардан құралған делегация әріптестерінің тәжірибесін зерделейтін болады. Бүгінде көптеген француз компаниялары «ЭКСПО-2017» халықаралық көрмесін дайындау және ұйымдастыру жұмыстарына белсене қатысуда. Сондықтан, қос мемлекеттің арасында фармацевтика, туризм, ауыл шаруашылығы салаларында ынтымақтастық орнатудың жаңа мүмкіндіктері туып отыр.
Ал, Астана қаласының күндері аясында Эйфель мұнарасы сәулетімен көз тартатын қалада қазақ этноауылы тігіліп, көшпенділердің мәдениеті мен тұрмысы таныстырылады. «Пале Рояль» алаңында бірегей жоба – ата-бабамыздың мәдениеті мен көшпенділердің өркениеті, тұрмыс-тіршілігі көрсетілмек.
Париж алаңында шығыс базары үлгісіндегі жәрмеңкеде киіз үйлер тігіліп, ішінде әшекейлер, былғары мен ағаштан жасалған бұйымдар, қолөнершілердің жасаған кәдесыйлары сатылады. Этноауылды аралау үшін қос бағана ортасына тартылған теріге ұқсатып арнайы жасалған ерекше карта-сызба ілінеді.
Сонымен қатар, қонақтардың өз қолымен киіз үй тігуіне немесе құмыра жасауына, зергерлердің шеберлік сыныптарына қатысуына жағдай жасалады.
«Шеберлер ауылы» киіз үйі өзінің мол мүмкіндіктерімен, жабдықтарының әдемілігімен көпшілікті тәнті етпек. Сахна төрінде Астана қаласының әншілері мен шығармашылық ұжымдары өз өнерлерін ортаға салады.
Сахна жанына алтыбақан орнатылады. Ал ортаға ту мен тұмарлардың айналасына диаметрі тоғыз метр және биіктігі бес метрлік Ақ орда – киіз үй тігіледі.
Сағи ОРАЛ