Бiлiм беру реформаларына қатысты ең алдымен педагог мамандар өзгеруi керек екенi түсiнiктi. Педагогтар өздерiне мемлекет қойып отырған талаптардың «аспаннан алынбағанын», жаңа заманның талабынан, қажеттiлiктен туындағанын жете түсiнуi қажет. Бұл кәсiби талаптар бүгiнде ХХI ғасырдың адамзатқа салып отырған ортақ сынақтарымен тiкелей байланысты. Қазiргi кезде оларды елемей өмiр сүру мүмкiн емес. Ендiгi жерде мемлекеттердiң бәсекеге қабiлеттiлiгi осы сынақтардан өтуiне тәуелдi болмақ. Бұл сынақтардың бiрi – технологиялық сынақ өндiрiстi және адам тiршiлiк әрекетiнiң көптеген өзге салаларын түбегейлi жаңа, тиiмдiлiгi жоғары деңгейге көшiрудi талап етедi.
Астана қаласы Бiлiм басқармасының мәлiметтерiне қарағанда, елордада дәстүрлi оқу-тәрбие процесiне озық iс-тәжiрибелердi енгiзуде 26 бағыт бойынша 68 эксперименталды алаң жұмыс жасайды. Мұндай алаң тұжырымдамалары мен бағдарламаларын құруда ғылыми iзденiс нәтижелерi басшылыққа алынады. Бiрқатар мектептердегi эксперимент барысына ғылыми қызметкерлер тұрақты түрде кеңесшiлiк қызмет атқаруда. Осылайша, отандық бiлiм берудi дамытудың басты принциптерiнiң бiрi – бiлiм мен ғылымның өзара кiрiгуi жүзеге асуда. Тәжiрибелiк алаң жұмысының алдын ала жасалған болжамына жетiп, сәттi аяқталуы оның өзге оқу орындарына қолдануға педагогикалық және құқықтық негiз бередi. Экспериментсiз қызмет етiп жатқан мектептердi өзара салыстырған секiлдi, тәжiрибелiк алаңдарды саралау жұмысына да мән берiлуде. Мәселен, Астана қаласының Бiлiм басқармасы үстiмiздегi жылы «Бiртұтас педагогикалық процестi технологияландыру» деген ауқымды тақырыпта №58 орта мектепте қалалық ғылыми-практикалық семинар ұйымдастырылды.
Аталмыш семинарға басқарма қызметкерлерiмен бiрге «Астана дарыны» республикалық ғылыми-практикалық орталығының, Астана қаласы Бiлiм беру жүйесi кадрларының бiлiктiлiгiн арттыру және оларды қайта даярлау институтының мамандары, 40-тан астам мектеп басшылары қатысты. Отандық ғалымдардан педагогика ғылымдарының докторы, профессор, Қазақстан Республикасының Бiлiм және ғылым министрлiгiнiң Бiлiм беру сапасын бағалау Ұлттық орталығының жетекшi сарапшысы Т.Ғалиев, 2007 жылдың «ЖОО-ның үздiк оқытушысы» атағының иегерi А.Қисымова, Астана медицина университетiнiң доцентi Ә.Даниярова болды.
Семинарда Бiлiм басқармасының бастығы Әсима Бимендина №58 орта мектептегi тәжiрибелiк жұмысты атап өтiп, мұғалiмдердiң тәжiрибелiк бағдарлама аясында дайындаған оқу-әдiстемелiк әзiрлемелерiнiң көрмесiн, мектептiң әдiстемелiк және ресурстық кабинеттерiн тамашалады. Оның iшiнде аталмыш жұмысты теориялық және практикалық жағынан мектептiң төл басылымы – «Шын iлiм» журналының алғашқы санымен танысты.
Iс-шара соңында мектеп директорлары тәжiрибелiк бағдарламаның сынамалы оқыту-тәрбиелеу технологиясы арқылы жоспарлы сабақтарда оқушылар белсендiлiгiнiң айтарлықтай жоғары екенiн, сонымен бiрге оларға дайындалатын әр мұғалiм ұдайы iзденiсте жүретiнi жөнiнде пiкiр бiлдiрдi. Басқарма өкiлдерi мектептiң соңғы жылдары жеткен жетiстiктерiмен өзге тәжiрибелiк алаңдардың және кәдiмгi орта оқу орындарының танысуы әрi өз қызметiнде ұтымды тұстарын пайдалануы жайлы шешiм шығарды.
Елдос НҰРЛАНОВ