Астана прокуратурасы сыбайлас жемқорлықпен күресті ұдайы назарда ұстап келеді, деп хабарлайды www.astana-akshamy.kz/
Жыл басынан бері елордалық прокурорлар 217 тексеру және 82 талдау жүргізді, олардың нәтижесі бойынша 90 қадағалау актісі енгізілді және 23 материал тіркелді, сол сияқты оның ішінде сыбайлас жемқорлық бойынша құқық бұзушылықтар анықталды.
Сыбайлас жемқорлыққа қарсы іс-қимыл бойынша жүргізіліп жатқан жұмыс туралы Коммуникациялар қызметінде өткен брифингте Астана прокуратурасының Сотқа дейінгі тергеу және қылмыстық қудалау заңдылығын қадағалау басқармасының аға прокуроры Ербол Мақашев айтып берді.
Спикер астаналықтарға пара беру мен алу ауыр қылмыс болып саналатынын және ҚР Қылмыстық кодексіне сәйкес жазаланатынын ескертті. Бұл әрекеттер үшін жауапкершілік қылмыстың мән-жайына байланысты түрлі баптар арқылы қарастырылған.
Мәселен, пара алғаны үшін белгілі бір лауазымдарды атқару немесе белгілі бір қызметпен айналысу құқығынан өмір бойына айыра отырып, параның 70-80 еселенген сомасы бойынша айыппұл немесе 10 жылдан 15 жылға дейін түрмеде отыру қарастырылады.
Қосымша жаза ретінде мүлікті тәркілеу де бар.
Ал пара бергені үшін құқық бұзушы параның 50-60 еселенген сомасы мөлшерінде айыппұл салуға не 10 жылдан 15 жылға дейін бас бостандығынан айыруға үкім шығаруы мүмкін.
«Сондай-ақ, егер сіз билік өкіліне пара беру фактісі туралы өз еркіңізбен хабарласаңыз, Сіз қылмыстық жауапкершіліктен босатылуыңыз мүмкін екенін есте ұстаған жөн. Сондықтан Астана прокуратурасы азаматтарды сақ болуға және сыбайлас жемқорлық бойынша құқық бұзушылық фактілерін дереу хабарлауға шақырады», – деп түйіндеді спикер.
