Пункттерден 4785 адам ақыл-кеңес алды
Ұлан НАУШАБАЕВ, «Жұмыспен қамту орталығы» МКМ-нің Жұмысқа орналастыру және мониторинг бөлімінің меңгерушісі:
–Биыл халыққа қызмет көрсету орталықтары сияқты кісі қарасы мол жерлерден Жұмыспен қамту орталығының пункттері ашылғанын байқадық. Нәтиже қандай?
–Иә, биылдан бастап «Сапаржай» автовокзалында және Сарырарқа, Есіл аудандарының халыққа қызмет көрсету орталықтарында «Жұмыспен қамту бағдарламасы-2020» бағдарламасы жөнінде азаматтарға кеңес беретін пункттер ашқанымыздың арқасында елорданың еңбек нарығын реттеу мүмкіншілігі кеңейе түсті. Өйткені, қайта даярлау курстары бар екенін, елордаға қандай кадрлар жетіспей жатқанын жалпақ жұрт біле бермейді. Ал аяқтай барып, жөн сұрауға уақыт тапшы. Сондықтан халыққа біртабан болса да жақындайық деген оймен осылай ұйымдастырдық. Ашылғалы бері аталмыш пункттерден 4785 адам ақыл-кеңес алды. Есіл аудандық ХҚО-дан – 1260, Сарырқа аудандық ХҚО-дан – 2191, «Сапаржайдан» – 1366 адам қызметімізді пайдаланды.
-Сондай-ақ жиі-жиі жәрмеңке өткізіп тұрасыздар. Жұрт іздеген жұмысын тауып жатыр ма?
-Әрине. Мысалы, күні кеше ғана 19-20 маусымда өткен қажет мамандықтар жәрмеңкесіне саналуан қызмет көрсету түрімен айналысатын 54 жұмыс беруші қатысып, 1000-ға жуық жаңа жұмыс орнын ұсынды. Екі мыңға тарта адам келді. Әсіресе, жоғары оқу орнын енді бітірген жастар көп. Жәрмеңке қорытындысы бойынша 321 адамға жұмысқа жолдама берілді. Жастарды кәсіпке бейімдеуге жоғарғы оқу орындары да белсене атсалысты.
– Биыл қандай жаңа мамандықтар оқытылады?
–Техникалық мамандықтар, газэлектрдәнекерлеуші, ағаш шебері, құрылысшы сияқты қарапайым жұмысшы мамандықтар қашан да керек. Мысалы, 19 маусымда Үкімет қаулысымен «Жұмыспен қамтудың жол картасы – 2020» бекітілді. Астанада соның бірінші бағыты бойынша, яғни, әлеуметтік-мәдени инфрақұрылымдарды салу мен жөндеу, тұрғын үй-коммуналдық шаруашылығын модернизациялауға көңіл бөлу арқылы жаңа жұмыс орындары ашылады.
Ал үшінші бағыты бұрынғысынша қажет мамандықтарды қайта даярлауға арналып отыр. Олардың тізімі қажеттілікке қарай реттеліп отырады. Мәселен, Астанада мемлекеттікпен қоса, жекеменшік балабақшалар, шағын орталықтар ашылуда. Яғни, тәрбиеші мамандығы керек. Есепші мамандығына сұраныс көп. Сондай-ақ, EXPO-2017 қарсаңында такси жүргізушісі, аудармашы-гид мамандықтарын қосып отырмыз. Биыл шамамен 400-ден астам адам қысқаша оқу курсынан өтеді.