Кезекті сессияға дайындық барысында қалалық мәслихаттың бір топ депутаты елордадағы №2 жылу электр орталығына барып, атқарылып жатқан жұмыстармен танысты.
«Астанаэнергосервис» АҚ-ның басқарма төрағасы Сәуірбай Есжанов пен «Астана-
Энергия» АҚ-ның басқарма төрағасы Мақсат Ердембеков халық қалаулыларына аталмыш жылу орталығының құрылғыларын көрсетті. Осыған орай депутаттар №2 жылу орталығының қуаттылығы сағатына 120 мегаватты өндіретін бесінші агрегаттың жұмысын көздерімен көруге мүмкіндік алды. Сондай-ақ, халық қалаулылары алдағы жылдың жазында пайдалануға берілетін Е-550 жетінші қазандық агрегатын құрылымдау жайына қанықты. Осы жылу электр орталығының қарқынды дамып келе жатқан Астана секілді қаланы толықтай қамтамасыз етуге шамасы келмей отырғаны айтылды. «Сондықтан, елорда жылудың жартысын Екібастұз жылу-электр орталығынан сатып алуға мәжбүр» деді М.Ердембеков. Оның айтуынша, қаланың экологиялық ахуалын жақсарту мақсатында кәсіпорында жоспарлы жұмыстар жасалуда. Әсіресе, қалдықтардың, күлдің көлемін азайып, атмосфераға шығарылатын басқа да зиянды заттарды қайта өңдеудің жаңа технологияларын пайдалануға, пайдаланылған жерді қайта қалпына келтіруге мейлінше мән берілуде.
Талқыланған мәселеге байланысты депутаттар М.Шекенов, Б.Исабаев, З.Шібкенов, М.Оралов, Б.Солсанов пікір білдіріп, күл үйіндісінің құрамындағы заттарды бақылау жұмыстарының қалай жүргізіліп жатқанына көңіл бөлді. Ал,
депутат Бауыржан Исабаев жылу орталығынан шығарылатын күлді қайта өңдеп, оны құрылысқа, жол салу қамына пайдаланудың маңыздылығына тоқталды.
Көшпелі мәжілісті қорытындылай келе, қалалық мәслихаттың хатшысы Сансызбай Есілов елорданың ауасын ластаушы кәсіпорындардың бірі жылу-электр орталығы екенін, сондықтан, осы мәселені жан-жақты талқылап, алдағы уақытта қаладағы ғылыми қызметкерлермен және Л.Гумилев атындағы Еуразия ұлттық университетінің инженерлік факультетінің студенттерімен бірлесе жұмыс істеу керектігін ескертті.
Содан соң депутаттар «Астана Эко-Полигон НС» кәсіпорнын аралап, тұрмыстық қалдықтарды көму және қадеге жарату жайымен танысты.
Гүлбану
МАМЫРАЙЫМОВА
