Астана тойына орай «Қайсар керуен» ашық бұқаралық веложарысы ұйымдастырылады. Бұл қайырымдылық бағытындағы шара 29 маусым күні Салтанат сарайы алдындағы алаңнан басталады. Веложарысқа кез келген астана қала тұрғыны мен қонағы қатыса алады.
Жарыс алдында әр қатысушыға лотерея билетінің нөмірі ұсынылады. Сәтті нөмір сәйкес келген велошабандоздарға жиырма жаңа велосипед тарту етілмек. Аукцион мен веложарыстан түскен қаржы мүмкіндігі шектеулі жандар арасында спортты дамытып жүрген «Қайсар» спорт клубының тәлімгерлеріне беріледі.
Веложарыс барысындағы қайырымдылық шарасына Серік Сәпиев, Илья Ильин, Бақтияр Артаев, Ермахан Ибрайымов, Юрий Мельниченко сынды Олимпиада жеңімпаздары мен меценаттар, отандық эстрада жұлдыздары келеді. Сонымен бірге, «Астана» велокомандасының атынан лотты аукцион ұйымдастырылады.
Веложарыстың барлық бағдарында алғашқы медициналық көмек көрсету және қан қысымын өлшеуге арналған нүктелер қарастырылған. Салтанат сарайы алдындағы алаңда минералды су тарату нүктесі орналасады.
Веложарыс мәресі – «Сарыарқа» велотрегі алаңы.
Қатысушыларды тіркеу уақыты – 8:00.
Қатысушыларды қатарға тұрғызу уақыты – 8:40.
Веложарыстың басталу уақыты – 09.00.
Веложарыс мәресі, қатысушыларды сахна алдына тұрғызу уақыты – 09:30.
«Веложарыстың ең жас қатысушысы», «Веложарыстың ең егде қатысушысы», «Спортқұмар отбасы» аталымдары бойынша марапаттау уақыты – 10:00.
Қозғалыс бағытының картасы жеке беріледі.
Бұл веложарыс спорттық дода емес, мұның мақсаты – салауатты өмір салтын насихаттау және жастарды белсенді дене шынықтыру мәдениетіне, әсіресе, велосипед спортына тарту.
Әр астаналық тіркелу арқылы мүмкіндігі шектеулі жандар арасында спорттың дамуына өз үлесін қосуға мүмкіндік алады.
Асхат Райқұл
