ҚАЙЫРЫМДЫЛЫҚ ШЫРША МЕРЕКЕСІ
Елордадағы Қазақстан халқы ассамблеясы Астана қаласының қылмыстық-атқару жүйесі департаментімен және «Итальяно» мейрамханасы ұжымымен бірлесіп «Қайырымдылық арқылы бірлікке» атты жаңа жылдық шырша мерекесін өткізді.
Мүмкіндігі шектеулі балаларға, көпбалалы және тұрмысы төмен отбасының балаларына арналған қайырымдылық шараға Астана қаласының Есіл ауданындағы мүгедектер қоғамы мен Қызыл Ай қоғамы Астана қалалық филиалының өкілдері де қатысып, мереке қарсаңында мүгедек балаларға қолдау көрсетті.
Қырғыз мәдени орталығының төрағасы, Қазақстан халқы ассамблеясының мүшесі Ш.Исмаиловтың айтуынша, аталмыш шараны ұйымдастырудағы басты мақсат – «Бейбітшілік және келісім жол картасы» жобасының аясында мүмкіндігі шектеулі балақайларға қайырымдылық көрсету арқылы елімізді мекендеген барлық ұлттар арасындағы бірлікті сақтау, қоғамдық, этника және мәдени келісімді, ұйымдар арасындағы байланысты дамыту.
Шара барысында Астанадағы мүмкіндігі шектеулі 30 балаға жаңа жылдық қойылымдар көрсетіліп, әртүрлі сыйлықтар тапсырылды. Сондай-ақ, олар тәттіге толы дастарханнан дәм татты.
Мереке соңында балалар бейбітшілік және келісім символы ретінде ескерткіш кітапқа өз қолтаңбаларын қалдырды.
Гүлбаршын ӨКЕШҚЫЗЫ