ҚАЛА БЮДЖЕТІ НАҚТЫЛАНДЫ
Елорда әкімі И.Тасмағамбетовтың қатысуымен өткен қалалық мәслихаттың кезекті жиырма сегізінші сессиясында Астана қаласының 2014-2016 жылдарға арналған бюджетінің жобасы нақтыланды.
Қалалық Экономика және бюджеттік жоспарлау басқармасының басшысы Жанат Нұрпейісов Астана қаласы бюджетінің бес жылдық кезеңіне арналған әлеуметтік-экономикалық даму болжамы «Қазақстан Республикасының бюджет туралы» кодексіне сәйкес әзірленіп, дайындалғанын айта келе, оның жобасын депутаттардың назарына ұсынды. Осыған орай, 2014 жылы елорданың энергокешенін қайта құру және кеңейту үшін республикалық және жергілікті бюджеттерден қаржы бөлінетін болды.
– ЖЭО-1, ЖЭО-2 кеңейтіліп, қайта құрылады, сонымен қатар, қолданыстағы жылу энергия желілері қалпына келтіріледі. Аталған жұмыстардың нәтижесінде алдағы жылы электр қуатының көлемі жылына 120 МВт және жылу қуаттылығы 160 Гкал болады деп көзделген. Электр желілерінің өткізу қабілеттілігі 500-ден 1200 МВт, жылу магистраліндегі жылу 1179-дан 2702 Гкалға дейін артады. Бұдан басқа, тозған магистральдық желілердің көлемі 15 пайызға азаяды, – деді Ж.Нұрпейісов.
Сонымен бірге, елордада 2014-2016 жылдары желілік парк салу жоспарланып отыр. Желілік парктерді жаяу жүргіншілер, велосипед, қыста шаңғы, салт атты серуен жолдары, спорттық сауықтыру мақсатында жүгіру үшін су қоймалары мен ағын сулардың жанында жасаған жөн. Желілік парктердің ерекшелігі – ені 50 метрден 100-200 м дейін, яғни, өте аз және ұзындығы 1-10 шақырымға дейін болады.
Елорда халқын мәдени демалыс орындарымен қамтамасыз ету мақсатында «Абу-Даби Плаза» бірегей кешенінің және «ЭКСПО-2017» халықаралық көрмесін өткізу алаңының жанында желілік парк салу көзделіп отыр. Басқарма басшысының айтуынша, аталмыш парк 11,3373 га жерге орналаспақ, сонымен бірге 75,5 мың шаршы метр жер көгалдандырылады. Бұдан басқа, 2014-2016 жылдары Есіл өзенінің бойындағы парктің құрылысы аяқталып, қалалық паркті жөндеу-жаңғырту жұмыстары жалғасады.
Білім беру саласына келсек, алдағы жылы 9 мектептің құрылысын аяқтауға және 4 мектеп салуға қаржы бөлінеді. Сонымен қатар, 3 балабақшаның құрылысы жалғасады, тағы да 3 балабақшаны салу қолға алынады, 8 мектепке дейінгі нысан пайдалануға беріледі. Әрқайсысы 800 орындық құрылыс, байланыс және энергетика мамандарын даярлайтын 2 кәсіби техникалық лицейдің құрылысы келесі жылы басталады. Сондай-ақ, келер жылы қаламыздағы бастауыш сынып оқушыларының 50 мыңға жуығы тегін тамақтандырылады.
Денсаулық сақтау саласы бойынша сол жағалауда амбулаторлық-емханалық кешен, Өндіріс елді мекенінде және Досмұхамедұлы көшесінің бойында әрқайсысы 150 адамды қабылдауға арналған 2 алғашқы медициналық-санитарлық көмек көрсету орталығы ашылады деп жоспарлануда. Туберкулезге қарсы диспансердің құрылысы да жалғасады.
Басқарма басшысының айтуынша, Астана қаласының 2014-2016 жылдарға арналған жалпы бюджеті – 772,8 млрд теңге. Оның ішінде: 2014 жылға – 313,9 млрд теңге, 2015 жылға – 240,5 млрд теңге және 2016 жылға – 218,3 млрд теңге бөлінді. Жалпы, алдағы үш жылға белгіленген қала бюджеті тұрғындардың тұрмыс ахуалын жақсартуға бағытталған.
Сессия барысында Астана қаласы Жұмыспен қамту және әлеуметтік бағдарламалар басқармасының басшысы Алма Алтыбаева Қазақстан Республикасы Тәуелсіздігінің күніне Қазақстанда 1986 жылы Желтоқсан оқиғасына қатысушылардың ішінен саяси қуғын-сүргінге ұшырағандарға 20 мың теңге көлемінде біржолғы әлеуметтік көмек көрсету үшін қаржы бөлінгенін жеткізді.
Сонымен бірге қала мәслихатының 2014 жылға арналған жұмыс жоспары бекітіліп, кезекті сессияның қарауына енгізілген негізгі мәселелер мен келесі сессияның төрағасын белгілеу жөнінде келісілді.
Гүлбаршын ӨКЕШҚЫЗЫ