ЕЛБАСЫ НҰРСҰЛТАН НАЗАРБАЕВ «АСТАНА ҚАЛАСЫНЫҢ БАС ЖОСПАРЫ» ҒЫЛЫМИ ЗЕРТТЕУ-ЖОБАЛАУ ИНСТИТУТЫНДА БОЛЫП, ҚАЛА ТҰРҒЫНДАРЫНЫҢ ӘЛЕУМЕТТІК ЖАҒДАЙЫН ОДАН ӘРІ ЖАҚСАРТУ ЖӘНЕ ЕЛОРДАНЫҢ ИНФРАҚҰРЫЛЫМДАРЫН ДАМЫТУ ШАРАЛАРЫНА БАЙЛАНЫСТЫ ОЙЛАРЫН ОРТАҒА САЛДЫ.
«Аkorda.kz» сайтының хабарлауынша, Елбасы Астана халқының саны көші-қон үдерісі есебінен 900 мың адамға жақындағанын, олардың санын 2-3 миллионға жеткізу жоспарда жоқтығын, бұл үшін алдымен инфрақұрылымдық салада көптеген жобалар жасалу қажеттілігін айтқан.
Елбасы елорданың маңайы мен қаланың ішіндегі жер телімдері мәселесін көтеріп, кезінде жеке тұлғалардың иелігіне өтіп кетіп, әлі күнге игерілмей жатқан жерлерді мемлекетке кері қайтару мәселесін көтеріп, оны жүзеге асыруды прокуратураға тапсырды.
– Біз сол жер телімдерінің иелері кімдер екенін білетін боламыз және дәрежесіне, атақ-шеніне қарамастан, мемлекетке қайтартамыз, – деді Президент.
Сондай-ақ, Мемлекет басшысы ЭКСПО-2017 халықаралық көрмесі қарсаңында алғашқы жылдары асығыс салынған үйлердің қасбетін жақсартуды жалғастыруды тапсырды. Жеңіл рельсті көлікті іске қосу арқылы қаладағы көлік проблемалары да шешілуге тиіс.
Бұдан басқа да мәселелерге тоқталған Елбасы:
– Қаланы үздіксіз кеңейте беруге мүмкіндік жоқ. Астана – еліміздің әкімшілік орталығы. Ол тұрғындар үшін ықшам әрі жайлы, қолайлы болуы тиіс. Қала қалыпты даму үстінде. Біз салынатын құрылыстардың перспективасын зерттеуді жалғастыруымыз керек және елордаға көшіп келгенде бірден пәтер немесе үй беріледі деп жұртшылықты үміттендірмеуіміз қажет. Осы мәселенің толғағы жетті. Мен мұқият дайындалып, арнайы кеңес өткізуді тапсырамын, – деді.
Бұған қоса, Нұрсұлтан Назарбаев елорда маңында және қала ішінде «жасыл белдеуді» ұлғайту жұмыстарын жалғастыруды тапсырды.
Астана қаласының әкімі Иманғали Тасмағамбетов Мемлекет басшысына елорда архитектурасы мен қала құрылысы саласында жүргізіліп жатқан жұмыстар жөнінде баяндап, жобалық ұсыныстарды назарына ұсынды, сондай-ақ, қабылданған жобалардың іске асырылу барысы жайында хабардар етті.
Соңында Мемлекет басшысы бірқатар мәселелер жөнінде тиісті мемлекеттік органдарға нақты тапсырмалар берді.
