Қала қуатының қауқары қандай?

Астана қарқынмен дамып келе жатқаны соншалық, кейде жылу, электр желілеріне салмақ түсіп кетіп жатады. Елорданы қажетті тіршілік нәрімен қамтамасыз етіп отырған бірінші және екінші жылу орталықтары кешегі шағын ша­һарға шақталған болатын. Кейін қарыштап өркендеген бас қалада жылу мен жарық жетіспеушілігі байқалмас үшін осы жылу-электр орталықтары кеңейтіліп, қайтадан жаңғыртыла бастады. Мысалы, Астанаға таратылатын электр энер­гиясының 60 пайызға жуығын өн­діріп отырған «Астана-Энергия» АҚ-ның 2-ЖЭО былтыр мөлшері 2 млрд 405 млн кВт/сағ. электр­энергиясын шығарған. Ал жылу энергиясының көлемі – 5 млн 122 мың гигакалорийді құраған. Бұл 2011 жылмен салыстырғанда 30 млн 600 мың кВт/сағ-қа артық көрсеткіш. Кәсіпорын 2009 жылы басталған күрделі жөндеу жұ­мыс­­тарының арқасында осындай нәтижеге қол жеткізіп отыр. Сөйтіп, өткен жылу беру маусымы ешқандай кедергісіз өткен еді. Ал қала тұрғындарының пәтер­лерінде 40 градусқа жететін аязды күндердің өзінде жылу температурасы қалыпты сақталған.
Қала әкімдігінің баспасөз қыз­метінің мәліметіне қарағанда, 2-ЖЭО-дағы жөндеу-жаңғырту жұмыстары әрі қарай жалғасып, 2017 жылға дейін біртіндеп төрт бірдей су жылыту қазандығы мен екі турбоагрегат пайдалануға бе­ріледі. Бұл 2016 жылдың өзінде-ақ 240 МВт электр мен 560 Гкал/сағ қуатын қосымша өндіруге мүм­кіндік бермек. Алдағы уақытта осы жылу-электр орталығы ЭКСПО
көрмесі өткізілетін аумақты да жылу қуатымен қамтамасыз ет­пекші. Ол үшін ұзын-ырғасы 26 шақырымды құрайтын жылу магис­тралын салу жоспарланып отыр.
Елорданың 1-ЖЭО-ның да өн­­дірістік қуаты артып келеді. Мұн­дағы 2008 жылы басталған қайта жаңғырту жұмыстарының жобасы жылу энергиясын тарату үшін жұмсалатын жанармайдың шығынын азайтады әрі станса қуат­тылығын арттыратын болады. Атқарылған жұмыстардың нәтижесінде былтыр №3 қазан­дық агрегаты орнатылып, іске қосылған. Бұл жоба 2016 жыл­дың алғашқы ширегінде түбе­гей­лі жүзеге асырылады деген болжам бар.
Ал болашақта елордамызда үшінші жылу электр орталығы іске қосылатынынан жұртшылық хабар­дар. 2011 жылдан бері салынып жатқан өндірістің құрылысы кестеге сай жүргізіліп келеді. Ны­санның алғашқы кезеңі 2015 жылы пайдалануға беріліп, 2018 жылы толығымен тапсырылады деп жоспарланған.