ҚАЛЫҢДЫҚ КӨРКІ – КӨЙЛЕГІ
Осыдан үш жыл бұрын Астанада ашылған «Ақ ниет» кәсіпорны әуел бастан-ақ үйлену тойына арналған ұлттық үлгідегі киімдерді сатумен және жалға берумен айналыса бастаған болатын. Бұл ретте жеке кәсіпкер Меруерт Қоңырбаева алдымен киім тігетін ғимаратты жалға алып, тігін цехын қажетті құрал-жабдықтармен жарақтандырғаннан кейін қолынан іс келетін тігіншілерді жұмысқа қабылдады. Содан соң, киім тігуге арналған сапалы маталарды шетелден сатып алуға кірісті.
Уақыт өте келе, қазақтың ұлттық өрнегімен әдіптеліп тігілген әдемі той көйлектері мен оюлы камзолдарға сұраныс арта түсті. Бұл әлбетте, кәсіпкерлікті кеңейтуге жол ашады. Алғашында сатып алған Janome және Typical атты төрт машинасы ескіріп, қазіргі заман талабына сай келмейтінін ұққан Меруерт тұтынушылар талғамын ескере келе, Brother маркалы инновациялық тігін жабдықтарына қол жеткізсем деп армандайды. Өйткені, ол әлемде аталмыш компанияның компьютерлік тігін машиналарына тең келер құралдардың жоқ екенін жақсы білетін. Киім-кешекке кестелердің сан түрін салуға мүмкіндігі бар жоғары сапалы машинада көшірме жасауға арналған бейне бақылау да бар. Керемет емес пе?! Кәсіпкер көп ойланбастан, осындай заманауи техниканы сатып алуға асығады. Мұндай қадамға бару үшін көп қаражаттың қажет екені белгілі. Сөйтіп, М.Қоңырбаева Қазақстанның халық банкіне жүгінеді. Кәсіпкердің бастамасын банктегілер қуана қолдайды. Осылайша, Меруерт мемлекеттің өңдеуші өнеркәсіп саласында жұмыс істеп жүрген және экономиканың қызмет көрсету саласына жататын қызметтерді атқаратын шағын және орта бизнесті қаржыландыру бағдарламасы бойынша несие алады.
– Жобаны қарастыру барысында біз Меруерт Қоңырбаеваның ерекше кәсіппен, Қазақстанның этнографиялық мұрасын сақтаумен және дамытумен айналысып жүргенін де ескердік, – деді Халық банкі Астана
өңірлік филиалының директоры Нұрлыбек Сейдахмет. – Сонымен бірге, аталмыш бағдарлама бойынша «киім тігу» қызметін атқарып жүрген кәсіпкерлердің жобасын қаржыландыру қарастырылған. Бұл ретте Халық банкі мемлекеттік бағдарламалар арқылы кәсіпкерлерге белсенді түрде қолдау көрсетіп келеді. Мемлекеттік түрлі бағдарламалар аясында Халық банкінің Астана өңірлік филиалы жалпы сомасы 6,3 млрд теңгені құрайтын 27 жобаны қаржыландырды.
Банктің қолдауымен заманауи құралдарды сатып алуға мүмкіндік алған «Ақ ниет» кәсіпорнының келешекте әлі талай жас жұбайға қуаныш пен шаттық сыйлайтынына сенімдіміз.
Гүлбаршын ӨКЕШҚЫЗЫ