ҚАМКӨҢІЛ БАЛАЛАРДЫ ҚУАНТТЫ
Ел тәуелсіздігінің арқасында айрандай ұйып, дәстүріміз бен дініміз жарасып, ел тыныштығын сақтап отырған халықпыз. Осы тұста әлемнің алпауыт елдерімен терезесі тең, керегесі кең, босағасы берік еліміздің ішкі саясаты, сонымен қатар әлеуметтік сатыларының тең болуы, демократияның тұрақты әрі қуатты болуы – басты мақсат. Кез келген қазақ азаматы өзінің құқын ескере отырып, қоғамда белгілі бір рөл атқарады. Соның қатарында тай қолтығын терлетіп үлгермеген, толыққанды мүмкіндігі жоқ бауырларымызға қолдау көрсету – адамгершілік пен иманымыздың айнасы.
Абай атамыз «Адамзаттың бәрін сүй бауырым деп» деген шумағында, бәлкім, осындай мәселелерді меңзеген болар. «Адамның ұяты – бетінде, адамгершілігі – ниетінде» демекші, көмек қолын созып, сауаптан суарылуға бәрі дерлік құштар. Осындай игі бастамалар Астана қаласында жиі қолға алынады.
Көктемнің кенжесі мамыр айының 28-і күні Тұңғыш Президент музейінде мүмкіндіктері шектеулі балалар үшін «Өнердің ғажайып әлемі» атты арт-терапиялық сессия өтті. Бұл шара терапиялық сипатымен қатар эстетикалық бағытта ұйымдастырылды. Аталған емдеу сессиясының мақсаты мүгедек жеткіншектерді сауықтыру бойынша баламалы бағдарламаларды енгізуді жәрдемдесуге бағытталған. Мұндай әлеуметтік бағдарламалар ерекше санаттағы балаларды қоғамның түсінуі мен қолдауының көрсеткіші болып табылады. Арт-терапиялық сессияның қатысушылары үшін ұйымдастырушылар естелік сыйлықтарын да әкелген.
Бүлдіршіндердің жүзіне қуаныш сыйлағандардың бірі – «Таза жүрек – PUREHEART» қоғамдық бірлестігінің ұжымы сәндік-қолданбалы өнердің кәсіби шеберлері. Олар шара барысында эксклюзивті қолдан жасалған жұмыстарын көрсетумен қатар, моншақты өру бойынша шеберлік сабағын өткізді және табиғи тастармен, моншақтармен жұмыс істеу тәсілімен бөлісіп, балаларды қайталанбас әсем және көркем композицияны қалыптастыруға баулыды.
Кенже ҚОНЫСБАЙ