Қанаты қатайған «Жас қанат»
Биыл жиырма жетінші мәрте өткен «Жас қанат-2018» жас орындаушылардың республикалық байқауына Астананың атынан үш үміткер қатысса, соның екеуі мәреден озып келді. Елорданың таланттары аталмыш байқауда топ жармағанына біраз болып қалған еді, биылғы жеңіс қаланың 20 жылдық мерейтойына тамаша тарту болды.
Байқау әдеттегідей Бейбітшілік және келісім сарайында үш күн бойы дүрілдеді. Осы жолы бірінші күннен барлығы 12 әнші өнер жарысына кірісіп кетті. Алғашқы «Жас қанаттың» лауреаты, белгілі әнші Медеу Арынбаев айтқандай, жас орындаушылардың бұл додасы жылдан жылға жасарып келе жатыр. Биыл, негізінен, 16-17 жасар үміткерлер сахнада өнерлерін көрсетті. Оларға Медеу Арынбаевпен қатар «Жас қанаттан» қанаттанған Бақыт Шадаева, Нұрлан Абдуллин, Маржан Арапбаева секілді танымал әншілер, «Астана Опера» театрының дирижері Абзал Мұхитдинов, профессор Раиса Мұсақожаева, «Астана Опера» театрының бас хормейстері Ержан Дәуітов, Kazakh-TV телеарнасының директоры Сандуғаш Рақымжанова және байқаудың негізін қалаушы, продюсер Мұрат Ерғалиев баға берді.
Байқаудың бірінші күні байқау үміткерлерінің толқығаны байқалды. Тиісті ереже бойынша алғашқы күннен-ақ ең төменгі балл жинаған үш орындаушы конкурстан шығып кетуге тиіс болды. Мұнда астаналық Диас Кәрімжанов, алматылық Аян Тасыров және петропавлдық Дәмел Ортамышева сынды қатысушылардың бабы немесе бағы келіспей қалып, келесі кезең – жартылай ақтық сынға тоғыз орындаушы шықты.
Жартылай ақтық сынға тағы төрт қатысушы қалып қойып, ақтық сынға жүзден жүйрік, мыңнан тұлпар болып танылған бес әнші ғана жіберілді. Финалды келіп, тамашалаған «Жас қанат-1999» байқауының жеңімпазы Мәдина Сәдуақасованың айтуынша, ең бас бастысы, байқаудың қазылары үнемі әділдікке жүгініп, нағыз таланттарға жүлде береді. «Қазылар алқасында отырған адамдарда біреуге бүйрегін бұру деген жоқ. Бұл байқауда шын жүйрік қана озады» деді әнші. Финалдың алдында «Жас қанат – 2012» жеңімпазы Димаш Құдайберген қатысушыларға бейнежолдау жолдап, сәттілік тіледі.
Қорытындысында Риза Мағзом (Орал) және Сымбат Сейілханова (Алматы) байқаудың дипломанттары атанды. Үшінші орынға тиесілі «Қола қанатты» Алтынай Әбдімомынова (Қарағанды) иеленді.
16 жасар Замира Сағадиева Көкшетау қаласында туған. Кейіннен ата-анасы Астанаға көшті. Биыл Замира елордадағы №8 орта мектептің 10 сыныбын бітірді. Осының алдында «Аялаған Астана-2014» байқауының финалына шыққан. «Дауыс. Қазақстан балалары
– 2016» жобасына қатысты. Щучинск қаласында өткен Роза Бағланова атындағы республикалық байқауда бірінші орынды иеленген. Ал «Жас қанат-2018» байқауында Замира екінші орын үшін берілетін «Күміс қанатты» жеңіп алды.
Замирадан тек тағы бір астаналық Бақтияр Ақылбек озды. Бірінші орынды – «Алтын қанатты» иеленген Бақтияр Оңтүстік Қазақстан облысы Қазығұрт ауданының тумасы. Қазір Астанадағы Қазақ ұлттық өнер университетінің «Эстрада өнері» (саксофон) факультетінің студенті және «Чикаго» вокалды-аспаптық тобының солисі. Былтыр елордада ұйымдастырылған 1-ші республикалық университетаралық джаз-аспапты байқауына қатысып, бас жүлдені иеленді.
Бұған қоса, Астананың атынан қатысқан Бақтияр, Замира және Диас Кәрімжановқа «Астана» радиосы әндерді орындауға ротация сыйлады. Ұлттық дәстүрлерді сақтағаны үшін Нұрдәулет Қуандықұлы (Ақтөбе) «Хабар-24» телеарнасының арнайы жүлдесін иеленді. Ал Жанболат Таласбайға (Тараз) Астана қаласы Мәдениет және спорт басқармасының жүлдесі тапсырылды.
«Жас қанат-2019» байқауына қатысатын алғашқы жас орындаушылардың есімдері де белгілі болды. Биыл үшінші рет ұйымдастырылған «Арманға жеткізер бір қадам» атты «байқау ішіндегі байқауға» қатысқан Тоғжан Қали (Астана), Өркен Миров (Қарағанды) және Ақбота Құснадин (Қызылорда) келесі байқауға қатысуға жолдама алды.