ҚАРТТАРҒА ҚҰРМЕТ – ҚАСТЕРЛІ МІНДЕТ
Қазақстан халқы Ассамблеясының қоры Астана қаласының Қарттар мен мүгедектерге арналған медициналық-әлеуметтік мекемесінде «Шын жүректен» атты қайырымдылық акциясын өткізді. Тәуелсіздіктің 25 жылдығына орай ұйымдастырылған шараға қариялар, Ұлы Отан соғысының ардагерлері, мүмкіндігі шектеулі жандар және өнерпаз жастар қатысты.
– Бүгін осындай жаймашуақ күні ата-әжелердің көңілін көтермек ниетпен шағын той жасап бермекші болдық. Қазақтың бауырсағын, өзбектің палауын пісіріп, орыстың самаурынын қайнаттық. Бұл үйде 16 түрлі ұлт өкілі тұрады екен. Олардың да бір ауық ән-күй тыңдап, жастармен араласқысы келеді ғой. Ассамблея жанындағы «Жарасым» жастар қанатының, Еуразия ұлттық университетінің, Қазақ ұлттық өнер университетінің баяншы, саксофоншы, домбырашыларын жиып, алып келдік, – деді аталмыш қор жетекшісі Талғат Балпышев. Көңілді думан барысында Мәжіліс депутаттары Наринэ Микалеян, Снежанна Имашева, Шакир Хахазов та сөз сөйлеп, ақ тілегін жеткізді.