ҚАРЫМ-ҚАТЫНАС АЯСЫ КЕҢЕЮДЕ
Тула кәсіпкерлерінің Астанаға ресми сапары аяқталды. Құрамына Тула болат прокат зауыты, «Разумный дом», «Росавтоматизация» және басқа да белгілі компаниялар енген делегация Астананың «Астана-Solar», «Таза әлем – Астана» сияқты бірқатар ірі өндірістік нысандарын аралады.
Кәсіпкерлер палатасы директорының орынбасары Ғ.Тасмағанбетов тулалық делегациямен кездесудің қорытындысы бойынша Астананың ынтымақтастық орнатуға мүдделі және өз кезегінде, Тула облысына қазақстандық жобаларды ұсынуға әзір екендігін атап өтті.
«Қазір Тула компанияларымен танысу жұмыстары белсенді жүргізіліп жатыр, кәсіпкерлер қызметтің кейбір түрлері бойынша бірлесіп жұмыс істеуде. Соңғы кездері Кеден одағы шарттары күшіне еніп, шектеулердің алынып тасталуына байланысты белсенділік артты. Тула кәсіпкерлері де қаламыздың экономикасымен танысуда. Олар Астананың қарқынды дамуына қызығушылық танытып, құрылыс материалдары мен тазарту құрылыстарын ұсынды» деді Ғ. Тасмағанбетов.
Отандық кәсіпкерлердің ресейлік әріптестермен кездесуі сыртқы экономикалық байланыстарды кеңейтуге және Астана мен Тула облысының арасындағы екі жақты табысты ынтымақтастықты одан әрі дамытуға жаңа мүмкіндіктер берді.
Жұма ҒАЗИЕВ