Осы аптада Мемлекет басшысы Нұрсұлтан Назарбаев Премьер-министр Кәрім Мәсімов және Ұлттық банк төрағасы Қайрат Келімбетовті қабылдады.
Аталмыш басқосуда К.Мәсімов Мемлекет басшысына еліміздің бірінші жартыжылдықтағы экономикалық дамуының негізгі қорытындылары жөнінде айтып, Үкіметтің екінші жартыжылдыққа арналған жұмыс жоспары туралы баяндады.
Президент өз сөзінде негізгі макроэкономикалық көрсеткіштердің және валюта нарығындағы ахуалдың тұрақтылығын қамтамасыз ету қажеттілігін атап өтті. Сондай-ақ, әлемдік қаржы нарықтарында қалыптасып отырған ахуалға орай ұдайы болатын қатерлерге талдау жүргізуге баса назар аударды.
Ал, Қ.Келімбетов басқосуда елдің қаржы секторы мен банк жүйесінің жағдайы, сондай-ақ, Ұлттық банк жүргізіп отырған ақша-кредит саясаты жөнінде мәлімдеді. Оның айтуынша, 2014 жылдың бірінші тоқсанында ІЖӨ нақты өсімі 3,8% болды. Алдын ала деректер бойынша, Ұлттық қор мөлшері шамамен 77 млрд АҚШ долларына жеткен.
Кездесу соңында Мемлекет басшысы елдегі қаржы жүйесінің тұрақтылығын қамтамасыз етіп, экономиканың даму қарқынын сақтау жөнінде бірқатар тапсырмалар берді.
