Қадір түні – ең жақсы түн! Алла Тағала оны берекелі етті, яғни, Құранды түсіріп, басқа түндерден ерекшеледі. Осы ретте ислам ғұламалары қасиетті Қадір түнінде мына амалдарды жасаған абзал дейді.
Бірінші, бұл түні Алланың ризашылығы үшін ғибадат жасап, намаз оқып, құлшылығымызды арттыру керек.
Екінші, Құран Кәрім оқылып, тыңдалып, оны түсінуге ынта қойған абзал.
Үшінші, Пайғамбарымызға (с.а.у.) салауат айтып, оның шапағат етуінен үміттеніп, оның үмбетінен болғанымызды саналы түрде сезініп, жолын берік ұстануымыз шарт.
Төртінші, Уағыз-насихат тыңдап, сұхбаттар құрып, күнделікті күйбең тіршілік барысында жүрекке түскен кірбіңді жуып-шайып, көңілге ұялаған көмескіліктен арылуға тиіспіз.
Бесінші, қадір түніне қатысты жеткілікті мағлұмат беретін дін адамдарымен сұхбат құру керек. Әсіресе, адам өз-өзімен сұхбаттасып, қателіктерін танып, кемшіліктерін жоюға күш салып, достық қарым-қатынасын күшейтуге, бірлік пен тұтастықты арттыруға мән беруі тиіс.
Алтыншы, тәубе мен истиғфар жасап, өз нәпсісін есептен өткізіп, қателік жасаудан сақтанып, қайырлы істерді жасауға құмбыл болуы шарт.
Жетінші, Алланы терең еске алғаннан жүрек тынышталады. Ұлы Жаратушының ұшы-қиыры жоқ құдіретімен жоқтан бар болған жаратылыстың сырларын түсініп, иманымызды күшейту қажет.
Сегізінші, жиі-жиі дұға жасаған жөн. Өйткені, дұға – адамды Ұлы Жаратушыға жақындататын дәнекер. Пайғамбарымыз (с.а.у.) бұл түні көбіне мына дұғаны жасаған:
«Аллаһүмме иннеке афүввин түһиббүл афве фа фүанни». Яғни, «Алла сен кешірімдісің, кешіруді сүйесің, мені кешіре гөр».
Тоғызыншы, қадір түнінің күндізін де бейне кеш секілді өткізу ләзім. Осылай болған болса, мүбәрак түннің рухтарға төккен шұғыласы сіңімді болып, жүректің қақ төрінен орын алары сөзсіз.
Оныншы, қадір түнінің құрметіне Раббымыздан бүкіл исі бүтін мұсылмандардың күнәларының кешірілуін тілеуіміз керек. Қадір түнінің жақсылыққа мұрындық болуын, достық пен бауырмалдықты арттырып, ислам әлемінің бір тұтастығын және күллі адамзатты апаттардан сақта деп тілеуіміз шарт.
Гүлмира ШАРХАНҚЫЗЫ
