ҚАЗАҚ ЭСТРАДАСЫНЫҢ ҚЫРАНДАРЫ
Қазақ эстрадасының қазанын ортайтпай, отын өшірмеген екі топ болса, соның бірі – «МузАрт».
Тамылжыған әндерімен талайдың жүрегіне жол салып, жанын тебіренткен бұл ұжым биыл 15 жасқа толды. Өткенді саралап, ой түйетін, тындырылған тірлікке есеп беретін шақ нағыз. Осы орайда «МузАрт» өнерпаздары Астана төрінде ауқымды шығармашылық кешін ұйымдастырмақшы. Дүбірлі той 8 шілде күні «Қазақстан» орталық концерт залында өтеді.
ЖАРЫҚ ЖҰЛДЫЗ ЖАРҚ ЕТТІ
Еліміз егемендік алған тұста қазақ музыкасы он шақты жылдай өтпелі кезеңді бастан кешіп, үрең-сүрең күйде болды. Бұл құбылыс, әсіресе, эстрада жанрында қаттырақ байқалды. Осы кезде ресейлік әріптестерінің ізін сәтті жалғастыра білген орыстілді әншілер отандық шоу-бизнеске оңай бейімделіп кетті. Қайда барсаң, Парвиз Назаров, Кирилл Ли, «Яшлык» және «Мюзиколаның» атақтары аспандап тұрды. Ал қазақтілді ортадан тек «АБК» ғана бұлт арасындағы найзағайдай анда-санда жарқ ете қалатын. Бірақ жалғыз топтың әрекеті тәй-тәй басқан қазақ эстрадасының қанатын қатайтып, басқалармен бәсекелесе алуына жеткіліксіз болғаны айдан анық еді. Осылайша нарық дейтін асау теңізде қайықтай қалтылдаған қазақтілді сахна өз арнасын ХХІ ғасырдың табалдырығын аттаған соң барып тапты. Сол көштің басында «МузАрт» тобы тұрғанын ешкім жоққа шығара алмас.
Есімі бала күнінен елге таныс Мейрамбектің мұңды қоңыр үні, Сәкеннің сәні келіскен тұлғасы мен ашық тенор дауысы, Мақсаттан майдай ескен биязылық лебі бір-бірімен үндесіп, тыңдарманды лезде баурап әкетті. Топқа кейіннен қосылған Кенжебектің де өзіндік тұнықтығы трио ажарын одан сайын аша түсті. Әнге деген ептілігімен қатар, талғамға деген тектілігін де танытқан «МузАрт» жігіттері әр туындының тәлімі мен тәрбиесіне баса назар аударды. Соның арқасында басқаға ұқсамайтын жаңа стиль, тың болмыс қалыптастырып, қазақтілді және орыстілді болып қақ жарылған қазақстандық тыңдарманды ортақ аудиторияға тоғыстырды. Қысқасы, «МузАрт» нарықтың мұзына тайғанаған ұлттық эстрадамызды аяғынан тік тұрғызып, даңғыл жолға салып берді.
ЕҢБЕК ЕСКЕРУСІЗ ҚАЛМАЙДЫ
Сахнада өздеріне еліктеген топтар көбейгенде «МузАрт» мүшелері тағы да тапқырлық пен табандылық танытты. Олар үлкен ұжымды даярлау мен сақтаудың қиыншылығына қарамастан, тәуекелге бел буып, вокалды-инструменталды ансамбль құрды. Топтың арт-директоры Ерлан Жүнісбаймен, музыкалық продюсері Арман Бексұлтанмен ақылдаса отырып, қабілет-қарымы мықты музыканттардың басын біріктірді. Қазіргі таңда «МузАрт» құрамында Мейрамбек Бесбаев, Сәкен Майғазиев, Кенжебек Жанәбілевпен қатар Ғалымжан Артықбаев, Ерлан Құлахметов, Бексұлтан Арман, Ерік Жасақбаев секілді талантты азаматтар бар. Жұрттың көбі компьютердің қуатына сүйеніп, фонограммаға ден қойып жатқанда аталмыш ұжым вокалды-инструменталды ансамбльдің сүйемелдеуімен тірі дауыста ән салып жүр.
Халықтың ыстық ықыласына бөленген «МузАрт» мүшелерінің еңбегі лайықты дәрежеде бағалануда. Нәтижесінде Мейрамбек Бесбаев, Сәкен Майғазиев және Кенжебек Жанәбілов «Дарын» Мемлекеттік жастар сыйлығының иегерлері болып, Қазақстанның еңбек сіңірген мәдениет қайраткерлері атанды. Бұдан бөлек, «Алтын самұрық» жобасының он үздігі тізіміне енгені үшін марапатталды. Сонымен қоса, «МузАрт» тобы 2013 жылы қыркүйекте «Muzzone» телеарнасының ЕМА премиясында «Үздік ұжым» номинациясын жеңіп алды.
Сахна өнері қалың орман тәрізді. Онда мың сан ағаш өсіп, жетіледі. Кейбіреуі тым әлсіз, алға ұмтылуға қауқарсыз болады. Мұндайларды сәл жел шайқаса, бұтағы сынғыш, қопарылғыш келеді. Ну тоғайдың ішінде ұзақ жылдар бойы жайқалып, өңін бермейтін биік шыршалар да кездеседі. Олар аптап ыстыққа да, қақаған боранға да міз бақпайды. «МузАрт» тобы сондай алып шырша іспеттес. Еңбектеген баладан еңкейген қарияға дейін әсем әндерімен елітіп, көңілдеріне жібектей жылылық сыйлайтын серілерге бұқараның да берер батасы мол шығар.
СҮЙІКТІ ӘНДЕР АСТАНА ТӨРІНДЕ АСҚАҚТАЙДЫ
«МузАрт» тобының шығармашылық кеші алдында үш әншіні әңгімеге тартқан едік.
– Концерттен тыңдарман көп жаңалық күтеді. Шоу жасауға уәде бересіздер ме?
СӘКЕН: Біз енді ақыл тоқтатқан, кейінгі толқынға кеңес беретін жасқа жеттік қой. Оңды-солды секіріп, сахнаны басымызға көтергеніміз жарамас. Сондықтан даңғаза шоу жасауға құлшынбаймыз. Есесіне мәнді, мағыналы кеш ұйымдастырып, концертке келген әр қонақтың көңіліне жағатын жағымды әндерді орындаймыз. Бізді «МузАрт» вокалды-инструменталды ансамблі мен Қазақстанның еңбек сіңірген өнер қайраткері Александр Абылаевтың жетекшілігіндегі эстрадалық-симфониялық оркестр сүйемелдейді.
КЕНЖЕБЕК: Концертте 4 жаңа әніміз айтылады. Онымен бірге, ел есінде қалған ескі әндерімізді де шырқаймыз.
– Мерейлі шараның Астана күнімен тұспа-тұс келуі де жауапкершілік жүктей ме?
МЕЙРАМБЕК: Бұл орайда елорда әкімдігінің қолдауы өте зор. Айтулы дата аясында бас шаһардың төрінде жеке кешімізді беру – абыройлы шаруа. Оның үстіне, концертіміз ел тәуелсіздігінің 25 жылдығы қарсаңында өткелі отыр.
СӘКЕН: Астана жұртшылығы аса талғампаз. Жалпы, қала мәдениетінің қандай деңгейде екені бір көрген жанға белгілі ғой. Бәрінен бұрын шаһардағы көшелердің тазалығы, ғимараттардың асқақтығы, адамдардың сыпайылығы ұнайды. Әрине, шет жақтағы аудандарда әлі де атқарылар істер баршылық. Былайғы көпшілік әншілерді «әуежайдан түсе сала орталыққа тартады, тек жылтыр нәрсені ғана көреді» деп ойлауы мүмкін. Әйткенмен, біз де бәрін бағамдаймыз. Көш жүре түзеледі демей ме қазақ?! Елордамен қатар, өзге де қалалардың әдемі әрі көрікті болғанына не жетсін?!
– Былтыр «Instagram» желісінде продюсер Жан Мұқановпен әзіл-шыны аралас бәстескендеріңізді білеміз. «МузАрттың» 15 жылдық мерейтойынан соң шаштарыңызды тықырлап алып тастайтын болған едіңіздер…
СӘКЕН: Оны орындадық қой. Негізі бұл идеяны шығарған – Мейрамбек. Ол 1987 жылдан бері шашын тықырлап алмапты (күліп). Достар арасындағы жеңіл қағытпа ретінде қабылдаңыздар. Алаңсыз, осылай әзіл жарастырып жүрген қандай жақсы?!
– Жазда демаласыздар ма? Әлде шығармашылық жұмыс қыза ма?
КЕНЖЕБЕК: Әзірге демалыс бұйырмайтын сияқты. Жазда «МузАрт Live» жобасының басы-қасында боламыз. Бұйырса, бұл телешоу 16 желтоқсанға дейін жалғасады. Ақтық сыннан сүрінбеген жігіттерді жинап, жаңа топтың тұсауын кесеміз. Ізбасар інілерімізді өз жолымызбен баулып, өнер әлеміне енуіне мүмкіндік жасаймыз.
Ізденімпаз топтың ілкімді істеріне шын жүректен сәттілік тіледік.
Ботагөз МАРАТҚЫЗЫ