Қазақстан БҰҰ-ның электронды үкімет бойынша әлемдік рейтингінде 24-орынға ие болды, деп хабарлайды www.astana-akshamy.kz
Қазақстан цифрлық басқару саласында жаһандық аренадағы позицияларын нығайтуда. 2024 жылғы UN E-Government Survey есебіне сәйкес, ел электронды үкіметті дамыту бойынша әлемдік рейтингте 24-орынға көтеріліп, өткен есеппен салыстырғанда өз позициясын 4 сатыға жақсартты.
Айта кету керек, бұл Қазақстанның БҰҰ рейтингіне қатысу тарихындағы ең үздік көрсеткіштердің бірі.
Рейтингте БҰҰ сарапшылары электронды қызметтердің дамуын, адам капиталын және телекоммуникациялық инфрақұрылымды бағалайды.
«Бұл біздің цифрландырудағы және тиімді мемлекеттік басқаруға қол жеткізудегі жетістіктерімізді көрсететін маңызды көрсеткіш. БҰҰ рейтингі екі жылда бір рет жасалады және ол 193 елді бағалап, электронды қызметтердің дамуы, адам капиталы мен телекоммуникациялық инфрақұрылым сияқты негізгі аспектілерді ескереді. Бұл жетістік — бірлескен жұмыстың нәтижесі, және біз өз қызметтерімізді әрбір қазақстандық үшін қолжетімді, қауіпсіз және инновациялық ету үшін жұмысты жалғастыра береміз!», – деп атап өтті ҚР Цифрлық даму министрі Жаслан Мәдиев.
Есепте негізгі көрсеткіштер де атап өтілген:
Қазақстан өте жоғары EGDI көрсеткіші бар елдер тобына кіреді. Қазақстан 24-орынды иеленіп, Израильден кейінгі орынды алады және электронды үкіметті дамыту индексі (EGDI) өте жоғары елдер қатарына кіреді. Ағымдағы жылдың рейтингінде Қазақстаннан кейінгі орындарда: Уругвай (25 орын), Швейцария (26 орын), Түркия (27 орын), Франция (34 орын), Қытай (35 орын), Канада (47 орын) орналасқан. 2024 жылғы рейтинг 2022-2023 жылдары жиналған деректерге негізделіп, БҰҰ-ның 193 мүше мемлекетін бағалайды.
Онлайн-қызметтер бойынша ТОП-10. Қазақстан онлайн-қызметтер индексі (OSI) бойынша 10-орынға ие болып, әлемдік рейтинг көшбасшылары – Оңтүстік Корея, Дания және Эстониямен қатар тұр. Сондай-ақ Қытай, Германия және Австралия сияқты елдерден озып, осы саладағы алдыңғы қатарлы елдер қатарына кірді.
ТМД елдері арасында көшбасшы. Қазақстан ТМД елдері арасында көшбасшылығын жалғастырып, Ресей Федерациясынан (43-орын), Армениядан (48-орын), Өзбекстаннан (63-орын) және Әзербайжаннан (74-орын) озып тұр.
Теңізге шыға алмайтын елдер арасындағы жоғары жетістіктер (LLDC). Қазақстан теңізге шыға алмайтын елдер арасында 0.9009 EGDI индексімен 1-орынға ие. Одан кейін Моңғолия, Армения және Өзбекстан келеді.
Телекоммуникациялық инфрақұрылымды дамыту. Қазақстан телекоммуникациялық инфрақұрылым индексі (TII) бойынша өз позициясын 23 орынға жақсартып, 41-орынды иеленді.
Есепте сондай-ақ, Қазақстан цифрлық инфрақұрылымға белсенді түрде инвестиция салып, жасанды интеллект, блокчейн және заттар интернеті (IoT) сияқты озық технологияларды енгізу арқылы цифрлық трансформация саласында айтарлықтай ілгерілеуге қол жеткізгені атап өтілген. Бұл бастамалар басқаруды және мемлекеттік қызмет көрсетуді түбегейлі өзгертті, оларды қолжетімді әрі ашық етті.
Ұлттық ИКТ және цифрлық сауаттылықты дамыту стратегиясы, сондай-ақ мемлекеттік қызметтердің сапасын жақсартуға баса назар аудару елдің әлемдік рейтингтерде одан әрі өсуіне және оны әлемдегі цифрлық трансформация көшбасшыларының бірі ретінде нығайтуға ықпал етуде.
