Рио-де-Жанейрода өтіп жатқан Олимпиада ойындарының 5-інші күнінде Қазақстан құрамасының қоржыны екі алтын, бір күміс жүлдемен толықты.
Ауыр атлетикадан 69 келіге дейінгі салмақта ел намысын қорғаған Жәзира Жаппарқұл қос сайыс қорытындысы бойынша 259 келі салмақты бағындырып күміс жүлде жеңіп алды. Қытайлық Сян Янмей алтын алса, қола жүлдені мысырлық Сара Ахмед олжалады.
Ерлер арасында 77 келіге дейінгі салмақта қазақстандық Нижат Рахимов сайыс қорытындысы бойынша 379 келімен әлем рекордын жаңартып Олимпиада чемпионы атанды. Қытайлық Лью Сяоцзюн күміс, ал мысырлық Мохаммед Махмуд қола медаль жеңіп алды.
200 метрге брасс әдісімен жүзу сайысында қазақстандық Дмитрий Баландин үздік уақыт көрсетіп, Олимпиада чемпионы атанды. Дмитрий Баландин – суда жүзу спортынан Олимпиада чемпионы атанған тұңғыш қазақстандық спортшы.
Бокстан 48 келіде ел намысын қорғаған Біржан Жақыпов ширек финалда өзбекстандық боксшы Хасонбой Дусматовқа ұтылып, жарысты аяқтады.
Жалпы есепте Қазақстан құрамасы 2 алтын, 2 күміс, 3 қола жүлдемен әзірге11-орында тұр.
