Сейсенбіде «Жастар» сарайында Жұмыспен қамту және әлеуметтік бағдарламалар басқармасының ұйымдастыруымен бос жұмыс орындар жәрмеңкесі өтті.
Аталмыш шарада елорданың мекемелері мен кәсіпорындары төрт жүзден аса бос жұмыс орнын ұсынды. Жәрмеңке барысында қаладағы қат мамандықтар – монтаждаушылар, құрастырушылар, электриктер, дәнекерлеуші, жинаушылар екеніне тағы да көзіміз жетті.
Сонымен қатар, Жұмыспен қамту орталығының мамандары қайта даярлау және жаңа мамандық алудың мүмкіндіктері туралы кеңес берді. Тігінші, аспаз, тәрбиеші, кіші мейірбике, сатушы-кассир мамандықтарына оқытатын курстарға өтініш берушілерді тіркеп, үміткерлермен сұхбат жүргізді. Ал, биылғы жоғары және орта оқу орындарының түлектеріне «Жұмыспен қамту 2020 жол картасы» бағдарламасы бойынша жастар тәжірибесінен өтуге қатысты және халықтың нысаналы топтағы өкілдеріне әлеуметтік жұмыс орындарына қызметке орналастыру тұрғысында мәліметтер берілді.
Соңғы кезде тұрақты түрде өткізіліп тұратын жұмыс жәрмеңкесі әлеуметтік қолдау жүйесіне тартылмаған азаматтарды қамтудағы игілікті шара ретінде тұрғындар арасында кеңінен қолдау тауып келеді.
Айгүл УАЙСОВА
