«Қисық» жарнамаларға тосқауыл керек
Бүгiн «Iскер» бизнес орталығында «Көрнекi ақпарат, жарнама тiлi» атты семинар өтедi. Астана қаласы Тiлдердi дамыту басқармасы мен «Зерде» тiлдердi дамыту жөнiндегi инновациялық орталығы ұйымдастыратын шарада көше бойларындағы көрнекi құралдарда, жарнамаларда өрiп жүрген қателер (қазақ тiлiндегi жарнамаларда) сынға алынбақ. Осы бағыттағы проблемалар ортаға салынбақ. Семинар алдында басқарма бастығы Ербол Тiлешовтi әңгiмеге тартқанбыз.
– Ербол Ердембекұлы, алдымен бүгiн қолға алған шараларыңыздың мақсатына тоқталсаңыз…
– Бүгiнде көше бойларындағы түрлi жарнамаларды, көрнекi құралдарды мерзiмдi басылымдар жиi сынға алып жүр. Жауапкершiлiгi бiзден сұралады. Алайда, ол «қисық» жарнама иелерiн жауапқа тарту бiздiң құзырымыздағы шаруа емес. Басқарманың қолынан келерi – түсiндiру, насихат жұмыстары ғана. Бүгiнгi семинардың да мақсаты – сол.
– Нақты қандай мәселелер қаузалады?
– Елордада 65-ке жуық жарнама агенттiгi бар екен. Солардың барлығының жетекшiлерiн жиынға шақыртып отырмыз. Сондай-ақ, тiл саласының мамандары, белгiлi ғалымдар да басқосуға ат басын бұратын болады. Шара екi бөлiмнен тұрмақ. Алғашқысында, өзiмiздiң қызметкерлер агенттiк өкiлдерiне жарнамаларды, көрнекi құралдарды жасауда, жазуда қателiктерге бой алдырмауды айтады. Әсiресе, қазақ тiлiндегi сөйлемдерге сақ болу қажеттiгiн жеткiзедi. Өйткенi, ол мемлекеттiк тiл, ана тiлiмiз екенiн естерiне салады. Олардың да ұсыныстары, пiкiрлерi тыңдалады. Ал, келесi бөлiмде арнайы келген мамандар, ғалымдар дәрiстер оқылмақ. Онда нақты қазақ тiлiнiң жазылу стильдерi, ережелерi үйретiледi.
– Басқарма тарапынан жарнама агенттiктерiмен байланыс жоқ па?
– Байланысқымыз-ақ келедi. Арнайы қызметкерлерiмiз де бар. Алайда, олар бiзбен санасқысы келмейдi. Жиында осы жағын да әңгiме ететiн боламыз. Агенттiк өкiлдерiне жиi-жиi байланысқа шығып, көрнекi құралдары мен жарнамаларын жарияламас бұрын, арнайы мамандарға қаратып алуларын ұсынамыз.
Айтқандай, семинарда арнайы дайындалған әдiстемелiк құрал да таратылады. Онда Қазақстан Республикасының «Тiл туралы» заңдары, жарнамалардың, көрнекi құралдардың үлгiсi қамтылған.