Елордада қалалық мәслихат астаналық «AMANAT» партиясы жанындағы «Жастар рухы» жастар қанатының филиалымен бірлесіп ұйымдастырған гранттарды тапсыру рәсімі өтті, деп хабарлайды astana-akshamy.kz
Елорданың жоғары оқу орындары мен колледждерінде білім алуға гранттар халықтың әлеуметтік осал топтарынан, көпбалалы отбасылардан шыққан балаларға, сондай-ақ су тасқыны салдарымен күресуге және қаланың басқа да әлеуметтік маңызды іс-шараларына көмектескен еріктілерге табыс етілді.
Акция бірнеше жылдан бері өткізіліп келеді әрі қаланың талантты және белсенді жастарын қолдауға бағытталған игі дәстүрге айналды. Биыл бастамашылық жасап жауапкершілік танытқан, әрі қаланың қоғамдық өміріне елеулі үлес қосқандарға ерекше назар аударылатын болады.
Осылайша, мәслихат депутаттары, көрнекті қоғам қайраткерлері және «AMANAT» партиясының белсенділері 10 қатысушыға сертификат, грант сертификатын табыстады.
«Біздің жастарымыз – жарқын болашаққа деген үміт. Ел дамуын жалғастырып, күшейе түсуі үшін жас ұрпаққа үлкен жауапкершілік жүктеледі. Осылайша өлшеусіз еңбегіңізбен және күш-жігеріңізбен осы гранттарды алуға лайық екендеріңізді дәлелдедіңіздер. Үнемі даму үстінде болыңыз, үйреніңіз және қоғамға пайда әкеліңіз», – деді мәслихат төрағасы Ерлан Каналимов.
Ұйымдастырушылар берілген гранттар жастарға адами капиталды дамытуға және елдің әлеуметтік әл-ауқатын нығайтуға ықпал ете отырып, білім беруде және қоғамдық қызметте жаңа биіктерге жетуге көмектесетініне сенімді.
Грант алушылардың бірі Құрман Дидар төтенше жағдайлар кезінде мұқтаж жандарға көмек көрсетуге белсенді қатысты.
«Мен төтенше жағдай кезінде, Абай облысында болған өрт кезінде, Қостанай және Солтүстік Қазақстан облыстарында су тасқыны кезінде ерікті ретінде атсалыстым. Партия филиалында гуманитарлық көмекті ұйымдастыруға, сұрыптауға және жүктеуге көмектестім. Сол сияқты 150-ден астам еріктілер іс-шарасын ұйымдастыруға мүмкіндік алдым – көпбалалы отбасылардың балалары іс-шараларға тегін қатыса алатындай етіп театрлармен, мұражайлармен, футбол клубтарымен келіссөздер жүргіздім. Сондықтан да мені грант алушылар тізіміне енгізді деп ойлаймын», – деді «Жастар Рухы» жастар қанатының еріктісі.
