Қоршаған ортаны қорғау көрмесі
Ұлттық музейде сиреп бара жатқан жан-жануарларды бейнелейтін National Geographic Photo Ark фотокөрмесі ашылды. Жер бетінен мүлдем жойылып кетудің алдында тұрған тіршілік иелері портреттерінің авторы – әлемге танымал фотограф Джоул Сартори.
Көрменің ашылу рәсіміне Ғылым және жоғары білім министрі Саясат Нұрбек, Парламент Мәжілісінің депутаты Дархан Мыңбай, медиа-менеджер Арманжан Байтасов, қоғам белсенділері және дипломатиялық қоғамдастық өкілдері қатысты.
– National Geographic-тің осындай жобасын көруге асығып келдік. Көрменің миссиясы – ұлтымыздың дәстүріне сай. Қоршаған ортамызға, жалпы жан-жануарларға үлкен құрметпен қарау халқымыздың болмысында бар. Ғасырдың аяғына дейін жоғалып кету қаупі бар осынша жануарлардың суретін көріп, өзіміз таңғалып отырмыз. Бұл экологиялық жаңаша ойлауды талап ететін үрдіс, соған бір қадам деп айтуға болады, – деді Парламент Мәжілісінің депутаты Дархан Мыңбай.
Көрмеге студиялық сапада түсірілген 74 сурет қойылды. Экспозицияны 4 желтоқсанға дейін Ұлттық музейдің 5 қабатында орналасқан залда тамашалауға болады.