ҚУАНДЫҚТЫ КУЗБАСС ТА ҚҰРМЕТТЕЙДІ
Қазаққа тән тектілікті танытып келе жатқан, жас та болса танымал актер Қуандық Қыстақбаев Ресей Федерациясының Кемеров облысы тағайындаған «Орден за почета Кузбасса» төсбелгісімен марапатталды.
Қыстақбаев – қалың қазақ арасынан суырылып шығып, аталмыш марапатқа қол жеткізіп отырған тұңғыш тұлға. Бұл жетістікке актер өзінің партизан-жазушысы, Халық қаһарманы һәм Ұлы Отан соғысының батыры жайында 4 бөлімнен тұратын «Қасым» фильмінде ойнағаны үшін қол жеткізіп отыр.
Түр-тұлғасы келіскен, өнерін шеберлікпен шыңдаған актерді губерния тарапынан марапаттауға Кемеров облысының губернаторы Аман Төлеевтің өзі мұрындық болыпты.
Қазақ әртісіне төсбелгіні табыстап, өнердегі жетістігімен құттықтау үшін Кемеровтен арнайы делегация келді.
Сөйтіп, кеше Қ.Қуанышбаев атындағы Қазақ музыкалық академиялық драма театрында кезекті қойылым – Думан Рамазанның пьесасы бойынша сахналанған «Абылай ханның арманы» спектаклінен кейін Қ.Қыстақбаевқа «Орден за почета Кузбасса» төсбелгісі табысталды.
Осы қойылымда Қыстақбаев Абылайдың рөлін сомдаған еді.
СҮБЕЛІ СӨЗ
Қуандық ҚЫСТАҚБАЕВ, актер:
– Расында да, бұл марапат Қазақстаннан алғаш рет маған беріліп отыр. «Қасым» фильмінде нар тұлғамызды сомдағаным үшін тағайындалған. Мен не дерімді білмей отырмын. Әрине, қуанышты екенімді жасыра алмаймын. Бұл төсбелгі Ресейдің бір облысының тағайындаған марапаты ғой дейін десем, «халықаралық» мәртебесі бар екен. Одан да маңыздысы, өзге елде оза шауып, ел басқарып жүрген ағамыз Аман Төлеев қол қойып беріп отыр. Сондықтан, бұл марапаттың мен үшін маңызы зор.
Нәзира БАЙЫРБЕК