Кеше Астана қаласы Белсенді ұзақ өмір сүру орталығының Есіл аудандық филиалында қалалық Ардагерлер кеңесінің «Кітап» акциясы басталды.
Соның аясында ардагер ұстаз, білім беру саласының үздігі, Қазақстан Журналистер одағының мүшесі, «Құрмет» орденінің иегері Еркін Дәуешұлының «Ауылымды сағындым», «Бір ғасыр», «Жаны жайсаң Жайық аға», «Қаламмен өрілген жылдар» және «Азаматтарымен ажарлы Ақкөлім» кітаптарының тұсаукесері өтті.
Іс-шараны елорданың Белсенді ұзақ өмір сүру орталығының Есіл аудандық филиалының жетекшісі Жанар Есенаманова ашып, акцияның мақсатына тоқталды. «Көтеретін жүгіңнің ең ауыры білім мен кітап болсын» ұранын ұстанған акция кітап оқу, кітапты насихаттау мен дәріптеу мақсатында қолға алынды. Тұсаукесерді жүргізген Астана қаласы Ардагерлер кеңесінің медиатоп мүшесі, журналистика ардагері Қарлығаш Құспан аға буынның өмірінде кітаптың алатын үлкен орны туралы айтып, оның тәрбиелік мәні жайында әңгіме өрбітті. Тұсауы кесілген кітаптардың авторын таныстырды.
Еркін Дәуешұлының негізгі мамандығы – физика-математика пәндерінің мұғалімі. Жоғары оқу орнын бітіргеннен кейін туған еліне оралып, директордың оқу-өндірістік мәселелері жөніндегі орынбасары, мектеп директоры болып еңбек етті. Ақкөл аудандық Білім бөлімінің басшысы, Сілеті аудандық партия комитетінің идеология бөлімінің меңгерушісі болды. Астанаға көшіп келгеннен кейін «Шарапат» әлеуметтік қызмет көрсету орталығында қызмет істеді.
Оның қаламмен достасқанына көп жылдың жүзі болды. Ақмола облыстық «Арқа ажары», өзіміздің «Астана ақшамы» газетінің тұрақты авторы. Басылымымыздың құрметті тілшісі деген атағы да бар. Негізінен, қоғамдағы өзекті мәселелер жөнінде, тұғырлы тұлғалар жайында жазады.
Тұсаукесерде Астана қаласы Ардагерлер кеңесі төрағасының орынбасары Мұрат Іргебаев, қалалық Ардагерлер кеңесі медиатобының жетекшісі Амангелді Әшіров, елорданың орталықтандырылған кітапханалар жүйесінің кітапханашысы, мәдениет саласының үздігі Сағыныш Сейдахметова, К.Байсейітова атындағы Қазақ ұлттық өнер университетінің бөлім меңгерушісі Аида Аймақова, Астана қаласы Белсенді ұзақ өмір сүру орталығының директоры Мұхтар Еркетаев ізгі лебіздерін жеткізді. Есіл ауданы әкімдігінің бөлім меңгерушісі Назгүл Жұмабекқызы аудан әкімі Дәрменияр Қыдырбек-ұлының атынан авторға сый-сыяпат көрсетті. Автор Еркін Дәуешұлы қаламмен қалай достасқанын әңгімелеп, әр кітаптың жазылу тарихына, мазмұнына тоқталды. Соның ішінде оның белгілі қаламгер, саяси-қуғын құрбаны, Ақкөл ауданының тумасы Жайық Бектұров тұлғасының туған елге танылуында, сол елдің перзенті, Кеңес Одағының Батыры, Қазақстанның тұңғыш Қорғаныс министрі, армия генералы Сағадат Нұрмағамбетов есімінің насихатталып, оған қатысты бірқатар игілікті істердің жүзеге асуына қосқан үлесі мол.
Іс-шара К.Байсейітова атындағы Қазақ ұлттық өнер университеті студенттерінің концертімен жалғасты. Әсем әндер әуелеп, Қазақстан Ардагерлер ұйымы Орталық кеңесі төрағасының орынбасары, ақынжанды азамат Көпболсын Бекмағамбеттің өлеңіне жазылған белгілі композитор, Қазақстанның еңбек сіңірген қайраткері Кентау Назарбектің «Ардагерлер маршы» әнінің тұсауы кесілді.
Аманғали ҚАЛЖАНОВ
