Жуырда «Автокомплекс» құрылыс объектісінде болған жазатайым оқиға кісі өлімімен аяқталды.
Майлин және Жирентаев көшелерінің қиылысында орналасқан «ЖарҚұрылыс» мекемесіне тиесілі нысанда жұмысшы жазым болды. Атап айтқанда, М. есімді азамат арнаулы бас киімінсіз қараңғы ғимараттың екінші қабатынан құлап кеткен. Алған дене жарақатының ауырлығына байланысты жедел жәрдем қызметкерлері жеткенше қайтыс болған.
Осы оқиғаға байланысты Астана қаласының прокуратурасы қылмыстық іс қозғады. Жүргізілген тексеру қорытындысына сүйенсек, мекеменің лауазымды басшылары тарапынан құрылыс объектісінде қауiпсiздiк техникасы мен еңбектi қорғау ережелерiнің талаптары өрескел бұзылған.
Прокуратураның нұсқауына сәйкес құрылыс мекемесінің жұмысы тоқтатылды.
